Pedagog-psiholog, IýNISEF jáne QR DM Respýblikalyq psihikalyq densaýlyq ǵylymi-praktikalyq ortalyǵynyń jattyqtyrýshysy Juldyz Mahataeva qashyqtan oqytýǵa balalar men ata-analardy psihologiialyq beiimdeý týraly aitty, dep habarlaidy QazAqparat.
Onyń aitýynsha, karantin bizdiń ómirimizdi túbegeili ózgertti. Mektepterde qashyqtan oqytý formaty engizildi. Balalar uzaq ýaqyt úide karantinde boldy. Osynyń bári adamnyń psiholgiiasyna áser etti.
«Qazir adamdar úiden jumys istep jatyr. Jalpy bárine ońai emes. Mundai kezde sizde paida bolǵan múmkindikterge nazar aýdaryp, úreige berilmeý mańyzdy. Eń bastysy, baibalam salmaý kerek. Óitkeni qazir barlyǵymyzda úrei bar, ol kez kelgen nársege bailanysty bolyp jatyr. Onyń ishinde jaqyndaryńyzdy infektsiiadan qalai qutqarýǵa bolady, úiden shyqpai-aq bir ai nemese belgisiz merzimge qalai ómir súrýge bolady, mektep baǵdarlamasyn qalai igerýge, emtihandardy qalai tapsyramyn degen siiaqty mazasyzdyq kóp. Mundai jaǵdai buryn bolmaǵandyqtan ne isteý kerektigin jaqsy túsinbeimiz. Onyń barlyǵy bul jaǵdaiǵa beiimdelmeýden bolyp otyr», - deidi psiholog.
Psiholog ata-analarǵa balasyn mektepke beiimdeýge kómektesetin birneshe mańyzdy usynystar berdi.
«Qashyqtan oqytý - bul eń aldymen jattyǵý, bos áýreshilik pen zerigýden qutylýdyń quraly emes ekendigin túsiný kerek. Tiisinshe, kúndizgi rejimde oqý úshin arnaiy ýaqyt bólý qajet. Bul ádettegi mektep ýaqyty bolsa jaqsy, iaǵni kúnniń birinshi jartysy bolǵany shart. Bul jaǵdaida vizýalizatsiia tehnikasyn qoldanyp kórýdi usynamyn. Ony kez kelgen qarapaiym adam qoldana alady. Ózińdi mektepke baryp bilim alyp jatyrmyn dep elestetińiz. Siz mektepke bardyńyz, tek bul jaǵdaida mektep úiińizde, bólmeńizde, jumys ústelińizde bolady. Iaǵni elestýteý arqyly mekteptegi atmosferany qalyptastyrý» - deidi ol.
Sonymen qatar, ol balalardyń fizikalyq belsendiligin yntalandyrý mańyzdy ekenin aitty.
«Stress - eń aldymen, deneniń fizikalyq reaktsiiasy, sondyqtan fizikalyq kúsh-jigerdi qajet etetin kez kelgen áreket balaǵa onymen tiimdi kúresýge áser etedi. Máselen, úidi tazalaý, jattyǵý, án aitý, bi bileý. Degenmen balany ózine qyzyqty emes nársege jumsamaýǵa tyrysyńyz. Ol nemen ainalysqysy keletinin anyqtańyz, sóilesińiz. Oǵan qosa balanyń shyǵarmashylyq qol eńbegin qoldaý kerek jáne árdaiym yntalandyryp otyrý qajet. Bala sýret salyp, qandaida bir qolóner buiymdaryn jasasa, odan bala lázzat alýy múmkin nemese ony stressten tynyshtandyrýdyń joly. Sondyqtan balanyń ainalysyp jatqan isine qurmetpen qarańyz», - deidi psiholog.
Spiker, sóz sońynda ata-analardyń psihologiialyq kómekke ǵalamtor arqyly da júgine alatynyn jetkizdi.
«Bizde covid-19.mentalcenter.kz/ru saity bar, onda mamandar qajetti kómek kórsetedi», - dedi spiker.
