QR Úkimet basshysy Baqytjan Saǵyntaev memlekettik menshik obektilerin satý jumysyn barynsha paidamen júrgizý qajettigin aitty, dep habarlaidy QazAqparat tilshisi.
Búgingi Úkimet otyrysynda Qarjy ministri Álihan Smaiylov qazirgi ýaqytta jekeshelendirýdiń keshendi josparynyń 887 obektisiniń 524-i saýda-sattyqqa shyǵarylyp, olardyń 444-i satylǵanyn atap ótti. Satý baǵasy 253 mlrd teńgeni quraǵan.
«287 nysan qaita uiymdastyrylý jáne taratylý satysynda 12 obektini jekeshelendirý obektileriniń tizbesinen alyp tastaý týraly QR Ekonomikany jańǵyrtý máseleleri jónindegi memlekettik komissiianyń sheshimi qabyldandy. Qaita uiymdastyrylatyn jáne taratylatyn obektilerdi qosa eseptegende, jekeshelendirýdiń keshendi josparynyń oryndalýy búginde 84 paiyz deńgeiinde qalyptasty. Osy jyly 257 obekt satylymǵa shyǵarylmaq. Is júzinde 142 obekti saýda-sattyqqa shyǵarylyp, 47 obekti boiynsha qaita uiymdastyrý jáne taratý týraly sheshim qabyldandy. Satylymdaǵy obektilerdiń ishinen osy jyly 63-i satyldy. Satý baǵasy 74 mlrd teńgeni qurady», - deidi Álihan Smaiylov.
Ministrdiń baiandamasyn tyńdaǵan Úkimet basshysy belgilengen nysandardy satý keste boiynsha júrgizilip jatqanyn aitty.
«Alaida Qarjy ministriniń (Álihan Smaiylov - avt.) baiandamasynda aitylǵan keibir nysandardy jekeshelendirýdiń sozylyp ketkenine ministrlikter, jergilikti atqarýshy organdar men holdingter nazar aýdarýy kerek. Nysandardy satýǵa qoiýdy jyldamdatýlary qajet. Jekeshelendirýdi memleket úshin barynsha tiimdi júrgizý qajet. Bul Elbasynyń tikelei tapsyrmasy», - dedi Baqytjan Saǵyntaev.
Premer-Ministr bul máseleni retteýdi óziniń orynbasary Erbolat Dosaevqa tapsyrdy.
