QR Premer-Ministri Baqytjan Saǵyntaev Úkimettiń jańa jumys oryndaryn ashýǵa qatysty josparyn jariialady, dep habarlaidy QazAqparat tilshisi.
«Úkimettiń naqty josparlary bar. Boljamǵa sáikes, aldaǵy 7 jylda shamamen 2 million jas maman - ýniversitet pen kolledj túlekteri otandyq eńbek naryǵyna shyǵady. Olardyń bárin jumyspen qamtý qajet. Osyǵan bailanysty biz 2025 jylǵa deiin 1 millionǵa jýyq jańa jumys ornyn ashýdy josparlap otyrmyz. Ol úshin jobalyq basqarý júiesi engizildi. Qazirdiń ózinde bazalyq salalarda ǵana emes, óndiristi avtomattandyrý jáne tsifrlandyrý baǵyty boiynsha jańa jumys oryndary ashylyp jatyr», - dedi B.Saǵyntaev eńbek naryǵynyń bolashaǵyna arnalǵan halyqaralyq forýmda.
Úkimet basshysynyń aitýynsha, búginde eńbek resýrstaryna boljam jasaýdyń ulttyq júiesi engizildi. Negizgi maqsat - jumys kúshine degen usynys pen suranysty zerdeleý. Sonyń aiasynda mamandardy daiarlaý jáne qaita oqytý sharalary atqarylady.
«2020 jylǵa deiin biz shamamen 550 kásiptik standarttardy bekitýdi kózdeimiz. Atalǵan standarttar ekonomikanyń negizgi salalaryn qamtityn bolady. Budan bólek, biz tehnologiialyq jańǵyrtýdyń nátijesinde bosap jatqan kadrlardy basqa jerge kóshirý tetikterin qolǵa aldyq. Barlyq aimaqtarda iri kásiporyndarmen birlese otyryp, tiisti sharalar atqarylyp jatyr. Biyldan bastap elektrondy eńbek birjasy iske qosyldy. Oǵan barlyq memlekettik jáne jeke menshik jumyspen qamtý ortalyqtary atsalysyp keledi. Bazada bos jumys oryndary men túiindemelerge qatysty biraz málimetter bar. Sonyń arqasynda jumysty jyldam tabýǵa bolady. Al jappai kásipkerlikti damytý baǵdarlamasy aiasynda 1 millionnan astam adam jumyspen qamtyldy. Osy saladaǵy jumys jalǵasa beredi», - dep atap kórsetti B.Saǵyntaev.
