Búgin 2018 jyldaǵy Úkimettiń alǵashqy otyrysynda QR Premer-Ministri Baqytjan Saǵyntaev Elbasynyń Joldaýyna qatysty birqatar tapsyrmalardy júktedi, dep habarlaidy "Ult aqparat".
«Keshe memleket basshysynyń «Tórtinshi ónerkásiptik revoliýtsiia jaǵdaiyndaǵy damýdyń jańa múmkindikteri» atty Qazaqstan halqyna Joldaýy jariialandy. Sondyqtan biz búgin Joldaýdaǵy tapsyrmalardy oryndaýǵa jaýapty memlekettik organdardy naqtylap alyp, mańyzdy qujatty iske asyrý úshin qajetti sharalardyń barlyǵyn qabyldaýymyz qajet. Jańa Joldaý Elbasymyz 2017 jyly jariialaǵan «Qazaqstannyń úshinshi jańǵyrýy» tuǵyrnamasyn ary qarai damytady. Maqsatymyz ózgerissiz qala bermek. Ol - búkil álemniń jańa tehnologiialyq qurylysqa kóshýi jaǵdaiynda eń damyǵan otyz eldiń qataryna kirý. Memleket basshysynyń tapsyrmasy boiynsha Úkimet elimizdiń 2025 jylǵa deiingi damýynyń strategiialyq josparyn jáne ilgeri basýymyzǵa birqatar baǵdarlamalyq qujattardy daiyndady. Jańa Joldaý atqarýshy biliktiń aldyna «Tórtinshi ónerkásiptik revoliýtsiia» usynyp otyrǵan jańa múmkindikter men odan keletin qaýip-qaterlerge elimizdiń sátti beiimdelýi úshin osy jyldan qalmai sheshilýi tiis naqty mindetterdi qoiyp otyr», - dedi B. Saǵyntaev.
Osy oraida ol Prezident óziniń Joldaýynda on negizgi maqsatty belgilegenin jáne olardyń barlyǵy jaqyn bolashaqta júzege asyrylýy qajettigin atap ótti.
«Birinshi basymdyq indýstriialandyrý men jańa tehnologiialardy engizýge qatysty. Investitsiialar jáne damý ministrligi múddeli memlekettik organdarmen, uiymdarmen birlese ónim eksporty men tehnologiialar transfertine ekpin qoia otyryp, otandyq kásiporyndardy jańǵyrtý men tsifrlandyrýǵa baǵyttalǵan jańa tetikterdi ázirleýi qajet», - dep atap ótti Úkimet basshysy.
Osy oraida qanatqaqty jobalardy aiqyndap, olardy iske asyrýǵa kirisý júkteldi. Bul baǵyttaǵy jumystarǵa Investitsiialar jáne damý ministri Jeńis Qasymbek jaýapty bolady.
Aqparat jáne kommýnikatsiialar ministrligi tiisti memlekettik organdarmen birge sharalar keshenin daiarlaýy tiis. Damý boiynsha tsifrlyq ári innovatsiialyq sheshimderdi daiarlaý turǵysyndaǵy sharalarǵa Nazarbaev Ýniversiteti, «Astana» halyqaralyq qarjy ortalyǵy, IT-startaptar halyqaralyq tehnoparki qamtylmaq. Sonymen qatar bul baǵytta zańnamalyq túzetýlerdi qamtamasyz etý tapsyryldy.
«Alataý» innovatsiialyq tehnologiialar parkiniń budan keiingi qyzmeti boiynsha Investitsiialar jáne damý ministrligi Aqparat jáne kommýnikatsiialar ministrligimen, Almaty ákimdigimen eki aptalyq merzimde naqty usynystar engizýi tiis. Investitsiialar jáne damý ministrligine indýstriialandyrýdyń úshinshi bes jyldyǵy memlekettik baǵdarlamasynyń jobasyn ázirleýge kirisýi qajet. Osy oraida tsifrlyq tehnologiialarǵa ekpin qoiylýy kerek», - dedi B. Saǵyntaev.
