Búgin QR Úkimetinde ótken baspasóz konferentsiiasynda «Qazaqstan Turǵynúiqurylysjinaqbanki» AQ basqarma tóraiymy Lázzat Ibragimova «Baqytty otbasy» áleýmettik turǵyn úi baǵdarlamasyna qatysýǵa qatysty úsh keńesimen bólisti.
Onyń aitýynsha, biyl baǵdarlamany iske asyrý tájiribesiniń negizinde baǵdarlamaǵa júgingender boiynsha, baǵdarlamanyń óziniń kriteriileri men turǵyn úi berý sharttaryna taldaý jasalǵan.
«Kelesi jyly baǵdarlamany ekinshi ret iske qosýǵa ázirlenip jatyrmyz. Birinshiden, baǵdarlamaǵa qatysýǵa niet bildirgender mindetti túrde kezekte bolyp, ony qadaǵalap, baǵytyn tańdaýy tiis.
Ekinshiden, baǵdarlama qatysýshylarynyń eńbek nemese kásipkerlik qyzmetten túsetin tabysy mindetti túrde bolýy kerek», — dedi L. Ibragimova.
Basqarma tóraiymy atap ótkendei, otbasylardyń kópshiliginiń máselesi - otbasy músheleriniń eshqaisynyń eńbek tabysynyń bolmaýynda.
«Ataýly áleýmettik kómek alatyn otbasylar keledi de, birneshe balaǵa alatyn tólemder somasynyń ortasha ailyq jalaqy mólsherinen kóp ekenin aitady. Biraq biz áleýmettik járdemaqy men ataýly áleýmettik kómekti tabys dep eseptemeimiz jáne mundai sanattaǵy otbasylarǵa baspana satyp alýǵa nesieler bermeimiz», — dedi L. Ibragimova.
Onyń aitýynsha, memleket ataýly áleýmettik kómekti balanyń turmystyq qajettilikteri úshin tóleidi. Mysaly, oqýshyǵa jaǵdailar jasaý úshin - kiimmen qamtý, sanitarlyq-gigienalyq jaǵdailar jasaý, tamaqtandyrý t.b. Nesieni ataýly áleýmettik kómektiń esebinen óteýge eshkim jol bermeidi. Sondyqtan «Baqytty otbasy» baǵdarlamasyna qatysý úshin ata-analardyń eń bolmasa bireýinde mindetti túrde eńbek tabysy bolýy qajet.
«Eger baǵdarlamaǵa qatysýdy josparlaǵan bolsańyz, onda Memlekettik zeinetaqy tóleý ortalyǵynan alynǵan anyqtamany usyný qajet, sońǵy 6 aida Biryńǵai jinaqtaýshy zeinetaqy qoryna aýdarylǵan aýdarymdar arqyly rastalatyn tabysyńyz bolýy kerek.
Úshinshiden, páter tańdaǵanda otbasynyń múmkindikterin, páter qunyn eskerý qajet. Baǵdarlama turǵyn úimen qamtýdy ǵana kózdemeidi, onyń qunynyń tolyqqandy ótelýin de qarastyrady», — dedi L. Ibragimova.
Sonymen qatar, ata-analardyń múmkindigi shekteýli balalardy tárbieleý úshin alyp otyrǵan járdemaqylarynyń tólený merzimi sheksiz.
«Múmkindigi shekteýli balany kútip-baǵyp otyrǵan ata-ana is júzinde osyndai jumyspen ainalysyp otyr. Sondyqtan, ataýly áleýmettik kómekten ereksheligi, baǵalaý jasaý kezinde biz tabys retinde eskeretin birden-bir járdemaqy - bul múgedek balany kútip-baqqany úshin tólenetin járdemaqy. Biraq bul jaǵdaida da biz qosymsha eńbek tabysynyń bolýyn talap etemiz», — dedi L. Ibragimova.
Aita keteiik, kelesi jyly 10 myń otbasy 2% jeńildik mólsherlemesimen jáne 10% bastapqy jarnasymen beriletin turǵyn úidi ala alady.
