Atyraý oblysy ákiminiń orynbasary, Májilistiń burynǵy depýtaty Baqytgúl Hamenovaǵa qatysty qylmystyq is sotqa tústi. Bul týraly Atyraý oblystyq sotynyń baspasóz qyzmeti habarlady, dep jazady Sputnik Qazaqstan agenttigi.
Sonymen qatar, Atyraý oblysy mádeniet basqarmasynyń basshysy Aqylbek Rysqalievtiń isi de sotta qaralady.
"26 mamyrda Atyraý oblysy ákiminiń orynbasary Baqytgúl Hamenovaǵa jáne Atyraý oblysy mádeniet, tilderdi damytý jáne arhiv isi basqarmasynyń basshysy Aqylbek Rysqalievke qatysty is Atyraý qalasy №2 sotynyń óndirisine tústi. Is Qylmystyq kodekstiń 366-baby 3-bóligi 2-tarmaǵy (Para alý) boiynsha sotqa berildi", - delingen habarlamada.
Sonymen qatar, "B" JShS direktoryna qatysty Qylmystyq kodekstiń 367-baby 2-bóligi (Para berý) boiynsha qylmystyq is te sotqa berildi.
Basty sot otyrysy 14 maýsym kúni ótedi.
Eske salsaq, byltyr jeltoqsan aiynda Atyraý oblysy ákiminiń orynbasary Baqytgúl Hamenova men oblystyq mádeniet basqarmasynyń basshysy Aqylbek Rysqaliev ustalǵan bolatyn. Olar Abai eskertkishin ornatýǵa memlekettik satyp alý shartyn jasaǵany úshin 4,5 million teńge para aldy degen kúdikke ilindi. Bas kezinde Hamenovany úi qamaqqa alǵan. Biraq 22 jeltoqsanda eki aiǵa qamaýǵa alýǵa sanktsiia berildi.
Baqytgúl Hamenova 2017 jyldyń kókteminde Májilis depýtaty bolyp turǵan kezde áleýmettik jelide tanymal boldy. Ol elordadaǵy Astana áýejaiyna sol kezdegi prezident Nursultan Nazarbaevtyń atyn berý týraly usynys aitty.
