QR Parlamenti Májilisiniń depýtaty Baqytbek Smaǵul "Qazaqstannyń kieli jerleri" jobasy aiasynda iriktelip alynǵan kieli oryndardy ulttyq valiýtalarda kórsetýdi usyndy.
«Mádeniet salasyndaǵy mem.saiasat «Rýhani jańǵyrý» baǵdarlamasyn iske asyrý turǵysynda» atty Úkimet saǵatyndaǵy Baqytbek Smaǵuldyń sózi:
Rýhani jańǵyrýdyń ustyny sanalatyn, mádeni muraǵa jatatyn tarihi eskertkishter men ulttyq qundylyqtardy nasihattaýdyń túrli joldary bar. Sonyń birine tolyǵyraq toqtala ketkim keledi.
Taiaýda áleýmettik jelilerde, el arasynda jáne aqparat quraldarynda Ulttyq bank tanystyrylymyn ótkizgen 500 teńgelik jańa banknotqa qatysty qyzý pikirtalastar júrdi. Oǵan qatysty qarjylyq retteýshi resmi túsinikteme berýge de májbúr boldy. Bul rette jańa 500 teńgede keskindelgen elordadaǵy «Moskva» kommertsiialyq biznes ortalyǵynyń búkil Qazaqstan úshin esh izgi simvoldyq mániniń joqtyǵy sózsiz.
Shyndap kelgende, búkil álemde ulttyq valiýtada tańbalanatyn beine simvoldyq mánge ie bolyp tabylady. Sondyqtan oǵan qoǵam da, ortalyq bankter de bei-jai qaramaidy. Muny damyǵan elder tájiribesinen de baiqaýǵa bolady. Tipti kórshi Reseidiń ózi biyl ainalymǵa túsetin 200 jáne 2000 rýbldiń jańa banknottarynda ne keskindeletinin búkil Resei boiynsha júrgizilgen ashyq konkýrs pen daýys berý arqyly tańdap aldy.
Sondyqtan bul mańyzdy is, iaǵni ulttyq valiýtamyzda ne beinelenetinin jalǵyz Ulttyq bank dizainerleriniń jeke tańdaýyna ǵana tastamai, qoǵamdyq talqyǵa shyǵarǵan da mańyzdy.
Osy oraida Elbasy jariialaǵan «rýhani jańǵyrý» strategiiasy ulttyq valiýtada da kórinis bergeni jón dep sanaimyn. Jáne bul tek teńgemizdegi jazýlardy keiin latyn grafikasyna kóshirýmen ǵana shektelmeýi qajet. Sonymen qatar ulttyq valiýtada barsha qazaqstandyqtar, sondai-aq kúlli túrki dúniesi qasiet tutar kieli jerler kórinis tapqany abzal.
Olardy alystan izdeýdiń, nemese Internetten qaraýdyń qajeti joq. Barlyǵy boiynsha jan-jaqty aqparattar, sonyń ishinde fotoderekter rýhani jańǵyrý aiasynda qolǵa alynǵan «Qazaqstannyń kieli jerleri» jobasy aiasynda jinaqtalýda. Tańdaý órisi de keń. Ǵalymdar men qoǵamdyq qairatkerler qazirdiń ózinde júz jalpyulttyq jáne 500-dei óńirlik mádeni eskertkishterdi iriktep alǵany málim.
Elbasy «Bolashaqqa baǵdar: rýhani jańǵyrý» atty baǵdarlamalyq maqalasynda olardyń bastylary qatarynda Ulytaý tórindegi jádigerler keshenin, Tarazdyń ejelgi eskertkishterin, Beket ata kesenesin, Altaidaǵy kóne qorymdar men Jetisýdyń kieli mekenderin jáne basqa da jerlerdi jatqyzdy.
Bul rette prezidenttik jobadaǵy «halqymyzdyń ulttyq biregeiliginiń myzǵymas negizin quraityn» tańdaýly kieli oryndardy kezek-kezekpen ulttyq valiýtada beineleý arqyly olardy barsha Qazaqstan halqyna, jas urpaqqa jáne elimizge keler sheteldik týrister men mártebeli meimandarǵa, sondai-aq jahandyq kollektsionerler arasynda nasihattap otyrýdy usynar edim. Sonda bul qazaqstandyqtardy, ásirese, jasóskinderdi patriottyq tárbieleýge, kieli oryndarǵa degen qurmette baýlýǵa úles qosady. Budan bólek, bul qadam kieli jerlerdi álem jurtshylyǵynyń nazaryna iliktirip, otandyq týrizmge serpin berýge yqpal eter edi.
Jaýapty tulǵalar osyǵan kóńil bólse, bul da rýhani jańǵyrýdyń bir bastaýyna ainalary anyq.
