Májilis depýtaty Baqytbek Smaǵul mektepke deiingi tárbie men oqytýdyń jan basyna shaqqandaǵy normativtik qarjylandyrý ádistemesine qatysty máseleni kóterdi, dep habarlaidy QazAqparat.
«Depýtattyq saýal mektepke deiingi tárbie men oqytýdyń jan basyna shaqqandaǵy normativtik qarjylandyrý ádistemesine qatysty bolmaq. Bul máselede úlken problema bar ekenin óńirlerge barǵanda tanysyp bildim. 2017 jyly QR Bilim jáne ǵylym ministrliginiń buiryǵymen bilim berý mekemelerin jan basyna shaqqandaǵy normativtik qarjylandyrý ádistemesi bekitilgen, onyń ishinde mektepke deiingi tárbie men oqytý uiymdary da qamtylǵan. Bul ádisteme 2020 jyly Qyzylorda qalasynda, al 2021 jyldan bastap oblys boiynsha qoldanyla bastady. Osy kezdegi tájiribe ádistemede eskerilmegen birqatar jáittardy kórsetti. Jobalyq qýaty tómen balabaqshalarǵa osy ádistememen eseptelgen qarjy jetkiliksiz. Nátijesinde, balabaqshalarda eńbekaqy men kommýnaldyq qyzmetterge bereshekter qalyptasyp, qyzmetkerlerdiń zańdy renishin týdyrýda», - dedi B. Smaǵul Bilim jáne ǵylym ministrligine joldaǵan saýalynda.
Onyń aitýynsha, bala-baqshalardaǵy shtat qurylymy QR Úkimetiniń 2008 jylǵy 30 qańtardaǵy 77 qaýlysyna sáikes bolýy tiis. Alaida, ádistememen eseptelgen qarjy jetkiliksiz bolǵandyqtan, naqty shtat sany kóptegen jaǵdaida qajettilikke sáikes emes.
«Ministrliktiń buiryǵymen bekitilgen ádisteme Qazaqstan Respýblikasy Úkimetiniń qaýlysyn oryndamaýyna ákelýde. Qyzmetkerler tolyq shtattyń ornyna 0,5-0,75 shtat birligimen jumys istep, olardyń eńbek quqyqtary buzylýda. Buǵan qosa, bir Qazaly aýdany boiynsha búgingi tańda 17 bala-baqshaǵa jabylý qaýipi tónip tur. Sonymen qatar, dál osyndai jaǵdai Túrkistan oblysynda da oryn alyp otyr», - dedi depýtat.
«Qazaqstan Respýblikasynyń Biýdjet kodeksiniń 42 babynyń 7 tarmaǵyna sáikes, ministrliktiń qabyldanǵan buiryǵy jergilikti biýdjet shyǵystarynyń ulǵaiýyna ákelýine bailanysty jetispeitin qarjy respýblikalyq biýdjet esebinen ótelýi tiis. Jáne de aldaǵy ýaqytta mundai jaǵdai oryn almaý úshin ádistemede jobalyq qýaty tómen bala-baqshalardyń normativine joǵarylatý koeffitsienti qoldanylýy kerek jáne jylýǵa qajetti qarjy ádistemeden tys bólek eseptelip qaralýy tiis», - dedi ol.
