Qala men turǵyndardyń tynys-tirshiligine qatysty júieli problemalar ákimdik otyrysynda qaraldy, dep habarlaidy Astana ákimdiginiń resmi saity.
Búgin qalalyq ákimdikte ákimniń tóraǵalyǵymen qalanyń tynys-tirshiligine qatysty máseleler talqylanǵan otyrys ótti. Baqyt Sultanov jinalysty kópbalaly analar máselesin qarastyrýǵa qatysty ákimdik tarapynan atqarylǵan júieli isterdiń júzege asyrylý barysynan bastady.
«Qazir aýdan ákimdikteri tiisti jaýapty mekemelermen birlesip, qaladaǵy órt qaýipsizdigin kúsheitip jatyr. Bizge óziniń áleýmettik qiyn jaǵdaiyn aityp kópbalaly analar habarlasty. Biz olarmen birneshe kezdesý ótkizdik, barlyǵynyń ótinish-aryzyn qabyldadyq. Osy aryzdardyń eshbiri ákimdik nazarynan tys qalmaidy», - dedi B. Sultanov.
Onyń sózinshe, Memleket basshysynyń tapsyrmasy boiynsha Úkimet janynan azamattardyń ómir súrý sapasyn arttyrýmen, sondai-aq kóp balaly otbasylardy qoldaý sharalaryn pysyqtaýmen ainalysatyn arnaiy jumys toby quryldy. Jumys tobyna Premer-ministrdiń orynbasary Erbolat Dosaev basshylyq etedi. Jumys toby eki ai ishinde Elbasy tapsyrmasyn júzege asyrý boiynsha keshendi sharalar qabyldaýy tiis. «Qazirgi kezde aýdan ákimderi azamattardy qabyldap jatyr. Bul jumys júieli jáne turaqty túrde júrgizilýi tiis. Ár ótinish boiynsha máseleni sheshý kerek», - dedi qala ákimi.
Kún tártibindegi kelesi másele qaladaǵy júieli problemalar. 8-shi aqpandaǵy jaǵdai boiynsha 28 júieli problema boiynsha «jumys júrgizilýde», onyń tek ony jabylǵan.
«Áriptester, esterińizge salamyn, atqarylǵan jumystardyń nátijesi boiynsha qaitalanyp qaralyp otyrýy tiis, múmkin qaita qarap durys sheshimder shyǵarý kerek bolady. Keiinnen barlyq qaralatyn máseleler boiynsha buqaralyq aqparat quraldarynda aitatyn bolamyz», - dedi B. Sultanov.
