Qazaqstannyń qarjy ministri Baqyt Sultanov BJZQ-nyń Ázirbaijannyń halyqaralyq bankinde "turyp qalǵan" qarjysyn qaitarýdyń birneshe jolyn aitty, - dep habarlaidy "Ult aqparat" kaz.tengrinews.kz portalyna silteme jasap.
Úkimet basshysy Baqytjan Saǵyntaev zeinetaqymen qamtamasyz etý týraly zańǵa sáikes "Biryńǵai jinaqtaýshy zeinetaqy qory" AQ-nyń iesi memleket ekenin atap ótken bolatyn. Iaǵni zeinetaqy jinaqtarynyń saqtalýyna memleket kepil.
"Men ázirbaijandyq áriptesimmen tildestim, premer-ministrmen, ol barlyq qaryzdy qaitarý boiynsha jan-jaqty kómek beretinin aitty. 23 mamyrda Londonda sheteldik kreditorlarmen kezdesý kezinde qaryzdy qaitarý joldary naqty aitylǵan bolatyn. Baqyt Turlyhanulyna Ázirbaijannyń qarjy ministrimen osy máseleni talqylap, muny baqylaýda ustaýǵa tapsyrma bergenmin. Egjei-tegjeili baiandap berýińizdi suraimyn", - dedi Saǵyntaev.
Baqyt Sultanov 2014 jyly BJZQ aktivterinen Ázirbaijannyń halyqaralyq bankine 10 jylǵa 8,25 paiyzben 250 million dollar (ol kezdegi baǵam boiynsha 45 milliard teńge) qaryz berilgenin aitty. Ulttyq bank málimeti boiynsha, osy ýaqytqa deiin Ázirbaijan bankinen 15 milliard teńge syiaqy alyndy.
"Ázirbaijannyń qarjy ministri eldiń ulttyq valiýtasy - manattyń quldyraýyna bailanysty Ázirbaijannyń Halyqaralyq banki kreditorlar aldyndaǵy mindetin oryndamady. Bul másele eldiń qarjy ministrliginiń erekshe baqylaýynda. Ol jaqtaǵy áriptester bank qaryzyn qaitarýǵa barynsha bolysatynyn aitty. Bizdiń basty mindetimiz - qaryz kólemin sol kúiinde qaldyrý. Bul - Qazaqstannyń basty ustanymy", - dep atap ótti Sultanov.
Sonymen birge, ol 23 mamyrda qaryzdy qaitarýdyń úsh joly aitylǵanyn atap ótti.
"Birinshi joly - 250 million qaryzdy 200 million etip, Ázirbaijannyń qundy qaǵazdary túrinde 5,125 paiyzben 12 jylda qaitarý. Ekinshi jol - ol da Ázirbaijannyń qundy qaǵazdary túrinde 3,5 paiyzdyq syiaqy mólsherimen 15 jylda qaitarý. Úshinshi jol - osy banktiń jańa qundy qaǵazdary túrinde 3,5 paiyzben 7 jylda qaitarý", - dep atap ótti qarjy ministri.
Usynylǵan joldardy qarastyra otyryp, Ulttyq bank jáne úkimet ókilderinen quralǵan top eń durys jolyn tańdaidy. Sonymen qatar, Baqytjan Saǵyntaev qarjy ministrinen bul máseleni baqylaýda ustap, úkimetti únemi aqparattandyryp turýdy surady.
