Astana ákimi Baqyt Sultanov máslihat depýtattarymen kezdesti, dep habarlaidy Astana qalasy ákimdiginiń resmi saity.
Kezdesýde ótip bara jatqan jyl qorytyndylanyp, keler jylǵa josparlar quryldy.
«Osy jyly qalada aýqymdy jumystar atqaryldy. Astana úshin 2018 bar jaǵynan jaqsy jyl boldy. Oǵan dálel jetkilikti. Bul rette tek 2018 jyldy joǵary ekonomikalyq kórsetkishtermen aiaqtap otyrǵanymyzdy aitsaq ta jeterlik. Jalpy óńirlik ónim kólemi boljamdyq baǵalaý boiynsha 6 trln teńgeni quraidy. Qalanyń ónerkásiptik kásiporyndary men qyzmet kórsetý salasy 544 mlrd teńgeden astam somaǵa ónim óndirdi jáne osylaisha ótken jylmen salystyrǵanda, oń yǵysý pliýs 9,6% belgisinde tirkelgen», - dedi qala ákimi.
Onyń sózinshe, 2017 jylmen salystyrǵanda óńdeýshi ónerkásiptegi óndiris kólemi 12,6% - ǵa ulǵaidy. Osy jyly júk tasymaldaý kólemi jalpy alǵanda 9% - ǵa ósti. Bólshek saýdada taýar ainalymynyń kólemi 1 trln teńgeden asyp 2017 jylmen salystyrǵanda 6% - ǵa ósti. Memlekettik biýdjetke salyqtyq túsimder 981,9 mlrd. teńge kóleminde jinalǵan, ol 2017 jylǵy kórsetkishpen salystyrǵanda 13,9 % - ǵa joǵary.
Baqyt Sultanovtyń aitýynsha, bul kórsetkishter shaǵyn jáne orta biznestiń esebinen qalyptasqan, jalpy óńirlik ónim qurylymynda onyń úlesi 55%-dy qurady.
«Alda jumys kóp. Osy úsh aida qalalyqtarmen jáne ÚEU sektory ókilderimen de kezdestim. Áleýmettik ortalyqtarǵa jii barýǵa tyrysýdamyn. Keshe balalar men qarttar úiine bardym. Men ózimdi shashymnan bashpaiyma deiin astanylyqpyn, qalany jaqsy bilem degen edim. Biraq, qala ákimi retinde qyzmetim bastalǵan úsh aida buryn kórgenimniń 10%-da kórmegenimdi túsindim. Bizdiń maqsat Astanany jahandyq qalaǵa ainaldyrý, ol kreativti adamdardy, talantty jastardy, sondai-aq týrister men sheteldik investorlardy tartatyn negizgi ortalyqqa ainalady. Ol úshin qala qurylysynda zamanaýi ýrbanistik sheshimder, jańa tásilderdi paidalaný qajet. Bir sózben aitqanda bizge qala turǵyndary men qonaqtaryna yńǵaily orta jáne múmkindigi shekteýli jandarǵa kedergisiz jaily jaǵdai jasaý kerek», dedi ákim.
Ákim depýtattarǵa nátijeli jáne birlesken jumystary úshin alǵys aityp, olardy kele jatqan Jańa jyl merekesimen quttyqtady.
