Túrkitildes memleketter yntymaqtastyq keńesine múshe elder basshylarynyń 7-shi sammitinde sóz sóilegen Elbasy Nursultan Nazarbaev Túrki keńesiniń tarihyna toqtalyp, ony damytýda eki bastama kóterdi, dep habarlaidy "Ult aqparat" Elbasy.kz aqparat kózine silteme jasap.
– Mereitoilyq mejege biz jaqsy jetistiktermen jettik. Birinshiden, jahandyq turǵyda da, óz ishimizde de uiymǵa suranys bar ekenin ári onyń ózektiligin dáleldei aldyq. Ekinshiden, Keńestiń qatary Ózbekstan men Majarstan esebinen tolyqty. Bul bizdiń birlesken jylnamamyzdyń jańa paraǵy. Úshinshiden, elderimiz salmaqty institýtsionaldyq arhitektýra qalyptastyrdy. Tórtinshiden, Keńestiń óńirlik jáne halyqaralyq deńgeidegi saiasi jáne ekonomikalyq bedeli ósip keledi. Besinshiden, Túrki álemi integratsiiasynyń tujyrymdamasy qabyldandy, – dedi Elbasy.
Qazaqstannyń Tuńǵysh Prezidenti Túrki integratsiiasy protsesin jalǵastyrýdyń mańyzdylyǵyna toqtalyp, Túrki keńesin odan ári damytý úshin eki usynys aitty.
– Birinshiden, «Túrki keleshegi – 2040» baǵdarlamasyn ázirleý.
Bul qujatqa túrki tildes qoǵamdastyqtyń uzaq merzimdi maqsattary men oǵan qol jetkizý joldary engizilýge tiis. Osylaisha biz memleketterimiz úshin syrtqy saiasat pen «jumsaq kúsh» saiasaty, saýda jáne tranzit, týrizm jáne investitsiia, energetika men jasyl ekonomika, shaǵyn jáne orta biznes siiaqty basym baǵyttardaǵy yntymaqtastyqty nyǵaitýǵa aitarlyqtai serpin beremiz, – dedi Nursultan Nazarbaev.
Sonymen qatar, Elbasy is-sharalar baǵdarlamasyna mádeniet jáne bilim berý, jastar saiasaty men densaýlyq saqtaý, tsifrlandyrý jáne jasandy intellekt salalaryn engizý qajettiligin atap ótti.
Sondai-aq, Qazaqstannyń Tuńǵysh Prezidenti «Túrki áleminiń besigi» – Túrkistan qalasyn damytýdyń mańyzdylyǵyna nazar aýdardy.
– Ekinshiden, bolashaqta Keńesimizdiń ataýyn qaita qaraýdy usynamyn. Túrki tildes memleketter yntymaqtastyǵy keńesin Uiym deńgeiine deiin kóterýge bolady dep sanaimyn. Osylaisha, bizdiń qurylymdy «Túrkitektes memleketter uiymy» dep ataýǵa bolady., – dedi Nursultan Nazarbaev.
Eske sala ketsek, búgin Ázerbaijan astanasynda Túrkitildes memleketter yntymaqtastyq keńesine múshe memleketter basshylarynyń 7-shi sammiti ótti. Sharaǵa TMYK elderiniń basshylary - Túrkiia Prezidenti Rejep Erdoǵan, Ázerbaijan Prezidenti Ilham Áliev, Qyrǵyzstan Prezidenti Sooronbai Jeenbekov, sondai-aq Qazaqstannyń Tuńǵysh Prezidenti - Elbasy Nursultan Nazarbaev qatysty.
Biyl Qazaqstan, Túrkiia, Ázerbaijan jáne Qyrǵyzstan prezidentteri qol qoiǵan tarihi qujat – Nahchyvan deklaratsiiasyna týra 10 jyl tolyp otyr. 2009 jyly Ázerbaijannyń Nahchyvan qalasynda ótken Túrkitildes memleketter basshylarynyń IX sammitinde Nahchyvan deklaratsiiasyna qol qoiyldy. Osylaisha, Qazaqstannyń Tuńǵysh Prezidenti Nursultan Nazarbaevtyń Túrki keńesin qurý ideiasy iske asqan edi.
