AQSh-tyń birqatar basylymdary 31 shildede "Ál-Qaida” terroristik uiymynyń negizin qalaǵan Ýsama ben Ladenniń uly Hamza ben Ladenniń mert bolǵanyn habarlady. Baspasóz quraldary AQSh ákimshiligindegi aty-jónin atamaǵan derekkózge silteme jasaǵan.
NBC News Aq úidiń AQSh áskerileri qatysqan arnaiy operatsiiada Hamza ben Ladenniń shynymen qaza bolǵanyna senimdi ekenin habarlady.
New York Times basylymynyń jazýynsha, arnaiy operatsiia sońǵy eki jyl boiy júrgizilgen, biraq osy kúnge deiin Ýsama ben Ladenniń ulynyń qazasyna dálel bolmaǵan.
Buǵan deiin biyl AQSh memlekettik departamenti jas shamasy otyzdan endi asqan Hamza ben Laden, "Ál-Qaida" uiymyndaǵy ákesiniń ornyn basýdy kózdep otyr dep habarlaǵan. Osydan keiin AQSh biligi biyl aqpanda ony ustaýǵa kómektesetin aqparat úshin million dollar syiaqy taǵaiyndaǵan. Mundai sheshimge Hamzanyń óz jaqtastaryna 2011 jyly amerikalyq arnaiy jasaqtyń qolynan mert bolǵan ákesi úshin kek alý maqsatynda AQSh-qa jabýyl jasaýǵa shaqyryp, internet arqyly aýdio jáne video úndeýler jariialaǵany sebep bolǵan.
Ýsaba ben Ladenniń taǵy bir uly ákesin ustaý úshin júrgizilgen operatsiia kezinde qaza bolǵan. Al úshinshi uly "Ál-Qaidaǵa" aralaspaǵan.
Saýd Arabiiasynyń "Ým ál-Kýra" basylymynyń habarlaýynsha, biyl naýryzda Hamza ben Laden ózi týyp-ósken osy eldiń azamattyǵynan aiyrylǵan.
Ýsama ben Ladenniń ózin AQSh-tyń arnaiy jasaq ókilderi 2011 jyly mamyr aiynda Pákistanda atyp óltirgen bolatyn.
AQSh-ta Hamza ben Ladendi "Ál-Qaida" terroristik toby jetekshileriniń biri dep sanaidy.
