Qazaqstanda "Zorlaý" babymen sottalǵan tórt azamatqa himiialyq kastratsiia qoldaný úkimi oryndalyp jatyr. Protsedýra jarty jylǵa sozylmaq. Bul aqparatty ishki ister ministrliginiń qylmystyq-atqarý júiesi komitetiniń (QAJK) resmi jaýabyna súiengen Tengrinews agenttigi habarlady. Agenttiktiń jazýynsha, zań boiynsha kastratsiia týraly úkim qylmysker jazasyn óteitin mekemede oryndalady.
"Pavlodar, Shyǵys Qazaqstan, Aqmola oblystary jáne Shymkent qalasy qylmystyq-atqarý júiesi komiteti mekemelerinde sottalǵan tórt adamǵa aýmaqtyq densaýlyq saqtaý organynyń meditsina qyzmetkerleri teksergen soń himiialyq kastratsiia túrinde májbúrlep emdeý sharasy júrgiziledi" delingen komitet habarlamasynda.
QAJK qazirgi kezde jaza óteý mekemelerinde himiialyq kastratsiia qoldaný týraly sot úkimi shyqqan 11 adam qamaýda otyrǵanyn habarlady. Quqyqtyq statistika komitetiniń dereginshe, Qazaqstanda eki jyl ishinde 15 adamǵa himiialyq kastratsiia qoldaný týraly sot úkimi kúshine engen.
Qylmystyq kodekske sáikes, himiialyq kastratsiia "kámeletke tolmaǵandardy zorlady" degen aiyp taǵylyp, qylmysy dáleldengen 18 jastan asqan tutqyndarǵa qoldanylady.
Shilde aiynyń sońynda Shymkent qalasynyń qylmystyq ister jónindegi mamandandyrylǵan aýdanaralyq soty "kámelet jasqa tolmaǵan eki qyzdy zorlamaq boldy" degen aiyppen sottalǵan er adamǵa himiialyq kastratsiia sharasyn qoldanýǵa úkim etken.
Qazaqstanda 2018 jyldyń 1 qańtarynan bastap himiialyq kastratsiia jasaý týraly zań kúshine engen.
