10 jeltoqsannan 8 qańtar aralyǵyndaǵy úgit-nasihat kezeńinde monitoringimen 500-ge tarta respýblikalyq jáne óńirlik BAQ qamtyldy, onyń ishinde 321 gazet, 47 telearna jáne 131 internet-resýrs bar. Bul týraly Ortalyq sailaý komissiiasynyń otyrysynda Aqparat jáne qoǵamdyq damý vitse-ministri Kemelbek Oishybaev málim etti, dep habarlaidy QazAqparat.
Elimizde qoǵamdyq-saiasi taqyrypta habar taratyp júrgen barlyq BAQ qamtylǵanyna toqtalǵan vitse-ministr: «Úgit-nasihatqa arnalǵan kampaniiany monitoringileý qorytyndysy boiynsha Parlament Májilisiniń jáne máslihattar depýtattarynyń kezekti sailaýyna qatysty barlyq BAQ-ta 22 myńnan astam material jariialandy (onyń ishinde 8822-si gazette, 6930-y telearnada, 6855-i internet-resýrsta). Bul óz kezeginde azamattar men BAQ tarapynan sailaýǵa joǵary qyzyǵýshylyqty taǵy da dáleldep otyr», - dedi.
Telearnalarda «Aq jol» men «Aýyl» partiialary birshama basym bolǵan, iaǵni efirlik ýaqyt boiynsha 21 paiyzdan tiesili boldy. Qalǵan partiialar turǵysynda efirlik ýaqyt birdei deńgeide bólingen – 19-20 paiyzdan.
Baspasóz BAQ-tarda «Nur Otan» partiiasy az-maz basymyraq bolǵany baiqaldy – 23 paiyz. Qalǵan partiialar boiynsha materialdar aýqymynyń úlesi kelesi deńgeide kórindi: «Adal» jáne «Aýyl» – 20 paiyzdan, «Aq jol» – 19%, Qazaqstan halyq partiiasy – 18%.
Sonymen qatar, internet-resýrstarda saiasi partiialardyń qyzmetin jariialaý birdei deńgeide qalyptasty, ár partiia boiynsha 20 paiyz shamasynda.
«Áleýmettik jelilerdegi úgit-nasihatqa toqtalsaq, naýqannyń bastalýyna arnalǵan Ortalyq sailaý komissiiasynyń otyrysynda atap ótkenimdei, áleýmettik jelilerdegi úgit-nasihatty esepke almadyq», - dedi Kemelbek Oishybaev.
Vitse ministr bul baǵytta vedomstvo halyqaralyq tájiribeni, sondai-aq zańmen tyiym salynbaǵan kez kelgen tásilmen óziniń azamattyq ustanymyn bildirýde ár adamnyń konstitýtsiialyq quqyn nazarǵa alǵanyn atap ótti.
«Jalpy, monitoring nátijesi boiynsha qazaqstandyq BAQ saiasi partiialarǵa buqaralyq aqparat quraldaryna teńdei qoljetimdikti qamtamasyz etti dep málimdei alamyz», - dedi ol.
