Ońtústik Koreia áskerileriniń habarlaýynsha, 10 qyrkúiekte Coltústik Koreia Japon teńizine qarata eki zymyran ushyrdy. Phenian iadrolyq baǵdarlamasynyń bolashaǵy týraly AQSh-pen kelissózderdi jalǵastyrmaq nieti baryn bildirgen soń ile-shala zymyran ushyrǵan, - dep jazady "Amerika daýysy".
Soltústik Koreia zymyrandarynyń qai aýmaqqa túskeni týraly ázirge aqparat joq.
Japoniia qorǵanys ministrligi el aýmaǵyna Soltústik Koreia ushyrǵan zymyrandar túskeni týraly málimet joǵyn, qazirgi kezde ulttyq qaýipsizdigine tótenshe qaýip tónip turmaǵanyn habarlady.
AQSh prezidenti Donald Tramp pen Soltústik Koreia basshysy Kim Chen Yn Ońtústik Koreia men Soltústik Koreia arasyndaǵy shekarada kezdeskennen keiin Phenian osymen segizinshi márte zymyran synaǵyn ótkizdi.
"Amerika daýysy" radiosy AQSh ákimshiliginiń joǵary laýazymdy ókiliniń "Biz Soltústik Koreianyń zymyran ushyrǵanynan habardarmyz. Biz jaǵdaidy baqylap, aimaqtaǵy odaqtastarymyzben keńesip otyrmyz" degen sózin keltirgen.
Seýl Pheniandy ballistikalyq zymyran ushyrýdy toqtatýǵa shaqyryp keledi. Ońtústik Koreia biligi zymyran synaǵy Korei túbegindegi shielenisti azaitýǵa septese almaidy dep sanaidy. Phenian zymyran ushyrýdy kórshi elge AQSh-pen áskeri saladaǵy yntymaqtastyǵy úshin jasalǵan eskertý dep ataǵan.
