Eýropa odaǵy Ýkrainada áskeri keńes jáne oqý missiiasyn qurýy múmkin. Bul týraly Germaniianyń Welt am Sonntag basylymy Eýropa syrtqy bailanystar qyzmetiniń ishki qujattaryna súienip habarlady, dep jazady Azattyq.
Jýrnalister málimetine qaraǵanda, missiiany qurýǵa Baltyq jaǵalaýyndaǵy elder men Rýmyniia, Slovakiia jáne Polsha múddeli bolyp otyr. Qujatta "missiiany qurýdaǵy maqsat - Eýropa odaǵynyń Ýkrainamen yntymaqtastyǵyn bildirý" dep kórsetilgen.
Welt málimetine qaraǵanda, missiia qurý týraly Eýropa odaǵynyń basshysy Jozep Borrelge Ýkraina syrtqy ister ministrligi men qorǵanys ministrligi byltyr, 2020 jyly jazda ótinish túsirgen.
Senbi kúni Ýkraina prezidenti Vladimir Zelenskii "Kiev Eýropa odaǵy men NATO-da budan ári qonaq sekildi júre almaidy, bul uiymdarǵa múshe bolatyn jóni bar" dep málimdegen. Zelenskiidiń sózinshe, Ýkraina halyqaralyq yntymaqtastyq salasynda úlken qadamdarǵa "táýekelshildigimen" jetken, biraq ol azdyq etedi. Eýropa odaǵy da, NATO da Ýkrainany qoldaitynyn bildirgenimen, múshelikke alar ýaqytyn aitpaǵan.
Kóktemde Resei ońtústik-batys shekarasyna qarai áskerin jyljytqan edi. Bul qadam Ýkrainamen ara qatynasyn taǵy da ýshyqtyra jazdaǵan. Batys elderi Máskeýden áskerin alyp ketýdi suraǵan. "Resei qorǵanys ministrligi óz áreketin kezekti oqý-jattyǵý ǵana dep túsindirip, Máskeýdiń Ýkrainamen ara qatynasty ýshyqtyrýǵa qulqy joq dep málimdegen. Biraz ýaqyttan soń áskerin shekaradan áketti. Shekarada qansha ásker qaldyrǵany belgisiz" dep jazady Welt basylymy.
