Bilim jáne ǵylym ministri Ashat Aimaǵambetov elimizdiń joǵary oqý oryndaryn tekserý jumysynyń qorytyndysyn jariialady, – dep habarlaidy «Ult aqparat».
«Búgingi tańda baǵalaý júiesiniń tizbesine engen 13 ýniversitet tekserildi. Olardyń 5-de buǵan deiingi eskertýler joiylmaǵandyqtan, 5 ýniversitettiń litsenziiasy bir aiǵa toqtatyldy. Sondai-aq, 12 joǵary oqý ornyna aiyppul salynyp, 1 ýniversitet boiynsha is sotqa jiberildi. Jyl sońyna deiin taǵy 12 JOO-ny buryn berilgen nusqamalardyń oryndalýy boiynsha tekserýdi josparlap otyrmyz. Buzýshylyqtar qaita anyqtalǵan jaǵdaida, litsenziiadan aiyrý jáne JOO jabý úshin qujattar sotqa jiberiledi» dep jazdy ministr Facebook-tegi paraqshasynda.
Ministrdiń málimetinshe, qazirgi ýaqytta mindetterine jaýapsyz qaraityn joǵary oqý oryndarynyń litsenziialaryn keri qaitaryp alýǵa quqyq beretin zań normalaryn engizý josparlanyp otyr.
«Bul bastama Memleket basshysy tarapynan qoldaýǵa ie boldy. Qazir litsenziiany qaitaryp alý úshin sotqa júginý nemese qajet bolǵan jaǵdaida barlyq shaǵymdaný protsedýrasynan ótý kerektigin esterińizge salamyn. Oǵan qosa, Premer-Ministrdiń ókimine sáikes Úkimet janynan joǵary oqý oryndaryn ońtailandyrý komissiiasy quryldy. Budan bólek, joǵary oqý oryndaryna qoiylatyn biliktilik talaptaryn da kúsheitýdemiz. Ásirese litsenziialarynda pedagogterdi daiarlaýǵa arnalǵan qosymshalary bar joǵary oqý oryndaryna qosymsha talaptar daiyndaýda. Olardyń sany – 85» deidi ol.
Ashat Aimaǵambetov búgin de kópbeiindi ýniversitettiń barlyǵy muǵalimderdi daiarlaitynyn, alaida olardyń sapasy syn kótermeitindikten, qoiylatyn talaptardy kúsheitý arqyly muǵalimderdi daiarlaityn JOO sanyn 85-ten 20-25-ke deiin qysqartý josparlanyp otyrǵanyn atap ótti.
«Olar basqa baǵyttar boiynsha mamandar daiarlai beredi. Al pedagogika boiynsha litsenziialary qaitarylyp alynýy múmkin. Shamamen alǵanda, ár aimaqta muǵalimderdi daiarlaityn 1 myqty JOO jáne Almatyda birneshe oqý orny bolmaq. Nashar sabaq úlgerimi úshin oqýdan shyǵarylǵandardyń bárin qabyldai berý esebinen keibir joǵary oqý ornyna 100 adam túsip, 800-ge jýyq túlek bitiretinin atap ótkim keledi. Taǵy bir jait, biyl 37 myń stýdent taiaý sheteldiń JOO-da bir semestr nemese bir jyl oqyǵan soń qazaqstandyq shaǵyn JOO-na aýysyp keldi. Aqparatqa súiensek, UBT sertifikatynyń talap etilýin ainalyp ótý úshin talapkerler qujattaryn sheteldik JOO jiberip, bir semestr nemese bir jyldan keiin virtýaldy túrde qazaqstandyq ýniversitettke aýysyp alatyn tendentsiia da bar. 20-23 myńǵa deiin stýdent oqityn jáne olardyń kópshiligi, ádette, sabaqqa da barmaityn keibir óńirlik jeke menshik JOO da bar» dedi ministr.
Sondyqtan da ministrlik osyndai jaǵdailar men jaýapkershiligi tómen JOO qatysty qatań saiasat júrgizbek.
«Álbette, bul sharalar barlyǵyna birdei unamai bermeitini anyq. Degenmen, Elbasy men Memleket basshysynyń tapsyrmalaryna sáikes, ministrlik joǵary bilim berý salasynda sapany qamtamasyz etý saiasatyn odan ári jalǵastyrady» dep túidi ministr.
