2026 jylǵy 22 maýsymda Pavlodar oblysyndaǵy «Baianaýyl» memlekettik ulttyq tabiǵi parkiniń Dalba bólimshesine jaqyn aýmaqta tirkelgen dala órti tolyq sóndirildi, dep habarlaidy ult.kz.
Órt bastapqyda Dolbai ormanshylyǵy aýmaǵynda tirkelip, memlekettik orman qory jerlerine taralý qaýpin týdyrǵan. Oqiǵa týraly habar túskennen keiin órt oshaǵyna ulttyq park qyzmetkerleri, Tótenshe jaǵdailar departamentiniń bólimsheleri, «Qazaviaormanqorǵaý» RMQK mamandary jáne jergilikti atqarýshy organdardyń ókilderi jedel jumyldyryldy.
Órt jaǵdaiyn baqylaý jáne sóndirý jumystaryn úilestirý úshin aviatsiialyq órtke qarsy qyzmeti bar ES-130 tikushaǵy tartyldy. Sonymen qatar, sý tógý qurylǵysymen jabdyqtalǵan QR TJM-niń «Qazaviaqutqarý» AQ-nyń Mi-8 tikushaǵy da órtti aýyzdyqtaý jumystaryna qatysty.
Resmi málimetke sáikes, órt 22 maýsym kúni saǵat 22:17-de tolyq sóndirilgen. Jedel jáne úilesimdi áreketterdiń arqasynda tilsiz jaýdyń memlekettik orman qory aýmaǵyna taralýyna jol berilmedi.
Mamandardyń aitýynsha, órt saldarynan orman qory jerlerine ziian kelmegen jáne materialdyq shyǵynnyń aldyn alý múmkin bolǵan.
Osyǵan bailanysty quzyrly organdar órt qaýiptiligi joǵary kezeńde azamattardy tabiǵi aýmaqtarda ot jaqpaýǵa, ashyq otty paidalanbaýǵa jáne órt qaýipsizdigi talaptaryn qatań saqtaýǵa shaqyrdy.
