Prodiýser Baǵym Muhitdenova ánshi Móldir Áýelbekovaǵa jaýap berip, oǵan qatysty birqatar málimdeme jasady, dep habarlaidy ult.kz.
Baǵym Muhitdenova Instagram paraqshasynda Móldir Áýelbekovany esimin atamai, «shákirtim» dep ataǵan.
«Únsizdikti álsizdik dep qabyldap júrgen “shákirtim”, aqylǵa toqtaityn jasqa jetseń de, basqa syimaityn áreket jasap, artyq sóz sóileýdi qoimapsyń», – dep jazdy prodiýser.
Ol Móldir Áýelbekovaǵa qazaq sahnasyna jol ashqanyn eske salyp, ánshiniń «bárine óz kúshimmen jettim» degen ustanymyn synǵa alǵan.
«Qudaiǵa shúkir aityp otyryp, sol qudaidyń «jaqsylyq jasaǵan adamǵa alǵys ait» degen amanatynyń ornyna «bálesinen aýlaq» deýiń durys pa? Qazaq sahnasyna esik ashyp bergenimdi umytyp, «bárine óz kúshimmen jettim» deýiń durys pa? Adal asymdy iship, shańyraǵymda turyp, betime kúlip, artymnan satqyndyq jasaǵanyń durys pa? Kúieýimniń nazaryn ǵana emes, ulym ekeýmizge tiesili qarajatyn alyp qoiǵanyń durys pa? «Aldyńa kelse, atańnyń qunyn kesh» degen halyqpyz, men bárin keshtim, sol sátte qaitadan quityrqy minezińdi kórsetýiń durys pa? Jyldar boiy óz jaramdy ózim tańyp, úndemei, ishtei jylap qana kelemin. Meniń kúiimdi bile tura, ózińdi qurban qyp kórsetýiń durys pa? Táýbá men tárbieni tilge tiek etseń, endigári biz jaqqa qarap sóileme. Sonda men de jumǵan aýzymdy ashpaimyn. Dál osy án seni Elge tanytty, ataq ákeldi, áli kúnge deiin tabys ákelip otyr. Sondyqtan, qaidan shyqqanyńdy, kimniń arqasynda tanylǵanyńdy umytpa…», – dep jazdy Baǵym Muhitdenova.
Aita keteiik, Baǵym Muhitdenova men Móldir Áýelbekovanyń arasyndaǵy burynǵy qarym-qatynasqa qatysty áńgime buǵan deiin de aqparat quraldarynda talqylanǵan.
