QR Prezidenti Ákimshiligi basshysynyń burynǵy orynbasary Baǵlan Mailybaev merziminen buryn bosap shyqty, dep habarlaidy "Ult aqparat" Nur-Sultan qalalyq sotyna silteme jasap.
«Sottalǵan B. Mailybaev jazasynyń ótelmegen bóligi boiynsha merziminen buryn bosap shyǵý týraly ótinish bildirdi. Sot ótinishti qarai otyryp, onyń zańmen belgilengen jazasyn, mekeme ákimshiliginiń oń minezdemesin, ishki tártip erejelerin saqtaýyn, eskertý almaǵanyn, 9 birdei kótermeleýge ie bolǵanyn, ózin ustaýdyń úshinshi oń deńgeiin, jumysqa turý múmkindiginiń baryn, is boiynsha basqa aryzdyń joqtyǵyn nazarǵa aldy. Osyǵan bailanysty Nur-Sultan qalasynyń Baiqońyr aýdandyq №2 soty 2020 jyldyń 14 mamyrynda B.Mailybaevtyń merziminen buryn bosatý týraly ótinishin qanaǵattandyrdy. Ol aiaqtalmaǵan 1 jyl 4 ai 21 táýliktik merziminde probatsiialyq baqylaýda bolady», - dep habarlaidy sottan.
Sonymen qatar sot B.Mailybaevqa ishki ister organdaryna kelip esep berip turýǵa, turǵylyqty jerinen ketpeýge jáne aýystyrmaýǵa, jumystan tys ýaqytta ishki ister organdary ruqsat etpeitin oryndarǵa barmaýǵa, QR aýmaǵynan tys jerge barmaýǵa mindettedi.
Eske salsaq, 2017 jylǵy 13 maýsymda Astana qalasy №2 Esil aýdandyq soty QR QK-niń 361-babynyń 4-bóligi, 185-babynyń 3-bóliginde qarastyrylǵan qylmystardy jasaǵanyn moiyndaý týraly kelisimmen sotqa kelip túsken Mailybaev Baǵlan Asaýbaiulyna jáne Galihin Nikolai Nikolaevichke qatysty qylmystyq isti qarap, sot úkimimen B.Mailybaev joǵaryda kórsetilgen baptar boiynsha kináli dep tanyldy jáne oǵan múlki tárkilene otyryp, memlekettik organdarda laýazymdy atqarý quqyǵynan ómir boiyna aiyryp, 5 jylǵa bas bostandyǵynan aiyrý jazasy taǵaiyndalǵan bolatyn.
