Bagam araldaryndaǵy qutqarý jumystary ýaqytsha toqtap qaldy. Kóshelerge kólge ainalyp, kólikter batyp ketken. Daýyldan keiin emhana, qoǵamdyq oryndar men ǵimarattardyń bári derlik sýǵa batty, dep habarlaidy New York Times.
Dorian daýylynan keiingi Bagam araldarynda teńiz tolqyp, qatty jel soǵýda. Eske sala keteiik, jeksenbiden bastap Bagam araldarynyń soltústik-batysynda ornalasqan Abako jáne Grand-Bagam araldaryn daýyl talqandap ketti. Bul – besinshi kategoriialy, Atlantikada tirkelgen eń joiqyn daýyldardyń biri. Basylym bergen aqparat boiynsha, Úlken Bagam araldarynyń 60 paiyzy qazir sýdyń astynda qaldy.
Bagam araldary Ulttyq qaýipsizdik ministri Marvin Deimstiń habarlaýynsha, Abakoda 7 adam qaza tapqan. «Onyń ishinde balalar da bar» dedi ministr.
Maiami daýyldardy zertteý ortalyǵynyń ókilderi Dorian daýylynyń qazirgi kategoriiasyn 2-shi satyda dep baǵalady, ol sársenbige deiin Floridaǵa jyljýy tiis edi. Meteorologtar daýyldyń kúshi saiabyrsydy degenimen, ol qutqarý jumystaryna kedergi keltirip, toqtatyp tastaýǵa itermeledi.
Bagam araldarynyń astanasy Nassaý qalasynda kómek kórsetý agenttigi qurylǵan. Alaida, jeldiń qatty soǵýy saldarynan tikushaqtar zardap shekken aimaqtarǵa jete almady. Admiral Todd Sokalzýk sheneýnikterge qońyraý shalyp, shatyrdyń tóbesinde otyrǵan, kómek surap jatqan turǵyndardyń kóp ekenin aitty.
Basylymnyń habarlaýynsha, samosval jáne órt sóndirý kólikteri sý basqan kósheler arqyly qutqarý jumystaryn jasaýǵa talpynýda.
Abako jáne Grand-Bagam araldary eń joǵarǵy núktede, 30 fýt biiktikte ornalasqan. Al daýyldyń saldarynan kúshpen aqqan sý 23 fýt biiktikti basyp qalǵan. Dorian daýyly saǵatyna 185 mil jerge jetetin jyldamdyqpen soqqan. Eń sońǵy ret mundai joiqyn apat Bagam araldarynda 1935 jyly tirkelipti.
