Parlament Májilisiniń jalpy otyrysynda «Eýraziialyq ekonomikalyq odaq sheńberinde baǵaly metaldarmen jáne asyl tastarmen operatsiialardy júzege asyrý erekshelikteri týraly kelisimdi ratifikatsiialaý týraly» zań jobasy maquldandy, dep habarlaidy "Ult aqparat".
Kelisimge Eýraziialyq ekonomikalyq odaqqa qatysýshy elder arasynda 2019 jylǵy 22 qarashada Máskeý qalasynda qol qoiyldy.
«Kelisimniń maqsaty – atalǵan salada múshe memleketterdiń básekelestik artyqshylyǵyn jasaý jáne tiimdi sharalar ázirleýge baǵyttalǵan saýda-ekonomikalyq tetikter qalyptastyrý. Sondai-aq, Odaqtyń kedendik aýmaǵynda baǵaly metaldar men asyl tastardyń erkin ainalymyn qamtamasyz etý úshin jaǵdai jasaý. Qujat baǵaly metaldar, asyl tastar jáne olardan jasalǵan buiymdardyń ishki naryǵyna qatysty quqyqtyq negizder men talaptardy aiqyndaityn 18 baptan turady», - dedi QR Indýstriia jáne infraqurylymdyq damý ministri Beibit Atamqulov.
Kelisim erejeleri aiasynda mámileler jasaý jáne asyl tastardyń jikteý ári qundyq sipattamalaryn anyqtaý, zergerlik jáne basqa da buiymdardy (EAEO ishinde ákelingen nemese óndirilgen) synamalaý, taldaý ári tańbalaý, baǵaly metaldar men asyl tastardyń zańsyz ainalymy úshin sharalar qoldaný eskerilgen.
«Kelisim EAEO-nyń zergerlik buiymdarynyń ishki naryǵyndaǵy saýdada múshe memleketterdiń synamalyq tańbalaryn ózara tanýdyń bolmaýyna bailanysty týyndaityn shekteýlerdi joiady. Iaǵni, eger zergerlik buiym Qazaqstanda jasalsa jáne synalsa, ol buiymdy EAEO-ǵa qatysýshy elderde ótkizý barysynda qaita synamalaý qajeti bolmaidy. Synamalyq tańbalardy ózara taný bastapqy sholý saparlarynan keiin (quramyna EAEO-nyń barlyq elderiniń ókilderi kiredi) qamtamasyz etiledi. Múshe memleketterdiń Kelisim erejelerin qanshalyqty oryndap jatqanyn anyqtaý úshin ondai saparlar bes jylda bir ret ótkizilip turady. Sondai-aq, qujat óńdelmegen tabiǵi almastardy Odaqqa múshe bir memleket aýmaǵynan ekinshisine tasymaldaýdy qarastyrady. Ol óńdelmegen tabiǵi almastardy sertifikattaýdyń halyqaralyq kestesi – Kimberlii protsesi talaptaryna sáikes iske asyrylady», – dedi ministr.
Onyń sózine qaraǵanda, Kimberli protsesine qatysýshy árbir el almastyń birde-bir partiiasy oǵan qatyspaityn tarapqa importtalmaitynyna nemese eksporttalmaitynyna kepildik beredi. Eýraziialyq ekonomikalyq odaqqa qatysýshy barlyq el - Kimberlii protsesiniń múshesi.
Sonymen qatar Kelisim aiasynda tiisti aqparatty almasý qarastyrylǵan.
«Bul normalar tolyq esep júrgizýge jáne sybailas jemqorlyqqa qarsy is-qimyl jasaýǵa múmkindik beredi. Sondai-aq Kelisim elde óndiriletin altyndy satyp alýda qatysýshy memleketterdiń basym quqyǵyn moiyndaidy», - dedi Atamqulov.
