Bokstan Qazaqstan quramasynyń bas bapkeri Ǵalymbek Kenjebaev Tokioda Vesti.kz tilshisine bergen suhbatynda komanda kóshbasshylarynyń jeńiliýine qatysty oiyn aitty, - dep habarlaidy Tengrinews.kz.
Eske salsaq, búginde besinshi boksshymyz Tokio Olimpiadasymen qosh aitysty. Abylaihan Júsipov, Vasilii Levit, Serik Temirjanov, Bekzad Nurdáýletov pen Nadejda Riabets 1/8 finalda jeńilgen bolatyn.
"Bekzad tóreshiler eseptegen soqqylardy ótkizip aldy. Jekpe-jek árine aýyr boldy. Birinshi raýndta ese jiberdi, ekinshisinde jeńdi, úshinshisi teń ótti. Bizdiń boksshy birinshi nómirmen jumys istedi, biraq, qabaǵy jaryldy, kezdesýdi toqtatyp otyrdy, jalpy bul aiqas osylai boldy... Reseilik boksshy - Bekzadtyń eń myqty qarsylastarynyń biri. Munda árine osaldary bolmaidy. Osy jekpe-jek úshin qatty alańdadym", - dedi Kenjebaev.
Bas bapker Vasilii Levittiń nokaýtpen jeńilýi týraly da pikir bildirdi. "Bolǵany boldy. Soqqyny ótkizip aldy. Iordaniiadaǵy týrnirden keiin babyna kele almady. Fizikalyq ta, psihologiialyq ta qiyndyqtary boldy, osy áser etken shyǵar", - dedi ol.
Kenjebaevtyń aitýynsha, Abylaihan Júsipov pen amerikalyq boksshynyń jekpe-jegi óte jaqyn ótti. "Bul Olimpiada. Jigitter bárin túsinedi, ózińnen asyp túsip, alǵa umtylyp, jumys isteý keregin aitamyz. Tyrysyp jatyr, kei tusta soqqylar jiberip alady", - dedi bapker.
Al Serik Temirjanovtyń jekpe-jegine qatysty boksshy "qolynan kelgenniń bárin istegenin" aitty. "Serik ázirshe osyndai boksshylarmen básekelese alatyn deńgeide emes. Bul salmaq bizde shamaly... 57 keli. Ol keiingi jyly Qazaqstan chempiony bolǵan, biraq bul - bizdegi eń qiyn salmaq", - dedi Kenjebaev.
