Aýyl sharýashylyǵy ministri Saparhan Omarov qai ónimder importtalatynyn aitty, dep habarlaidy QazAqparat.
«Ministrlik negizgi azyq-túlik taýarlarynyń 29 túri boiynsha turaqty túrde monitoring júrgizedi. Bul tizbeni shartty túrde úsh topqa bólýge bolady. Birinshi top – qamtamasyz etilýi 100 jáne odan da kóp paiyzdy quraityn azyq-túlik taýarlary (taýyq jumyrtqasy, kúrish, qoi eti, kartop, un, makaron jáne t.b.). Otandyq óndirýshilerdiń óndiris kólemi jetkilikti bolǵandyqtan, bularǵa basymdyq berilmeidi», - dedi ministr Parlament Májilisindegi Úkimet saǵatynda.
Onyń sózine qaraǵanda, ekinshi top – qamtamasyz etilýi 90 jáne odan asatyn paiyzdy quraityn ónim túrleri. Bular – maýsymǵa táýeldi bolatyn kókónis ónimderi (qyzanaq, qiiar, qyryqqabat, sábiz, basty piiaz, burysh), siyr eti, shoshqa eti, jylqy eti, qyshqyl sút ónimderi, sary mai jáne kúnbaǵys maiy. Kórsetilgen ónimderdi jetkilikti kólemde óndiremiz, sonymen birge az kólemde import ta bar.
«Úshinshi top – qamtamasyz etilýi 80 paiyzdan tómen ónim túrleri. Bular – qus eti, shujyq ónimderi, irimshik pen súzbe, balyq, alma men qant. Bul taýarlyq pozitsiialar boiynsha import jyl saiyn 580,7 mln dollardy nemese 220 mlrd teńgeni quraidy. Olar ekzotikalyq taýarlar emes. Bular óz elimizde óndiriletin jáne 2024 jylǵa qarai óz-ózimizdi qamtamasyz etý deńgeiine jetkizýge bolatyn taýarlar. Atalǵan mindetter sala aldyna qoiyldy, sondai-aq Nur Otan partiiasynyń sailaýaldy tuǵyrnamasynda da kórinis tapty», - dedi Saparhan Omarov.
Osy oraida ol ministrlik sút, qus etin, alma men qant óndirý kólemin ulǵaitýdy kózdeitin salalyq baǵdarlamalar ázirlegenin eske saldy.
