Elimizde azyq-túlik infliatsiiasy sál tómendedi. Bul týraly Senattyń jalpy otyrysynda QR Ulttyq banki tóraǵasy Erbolat Dosaev aitty, dep habarlaidy QazAqparat.
«Azyq-túlik baǵasynyń ósýi negizgi proinfliatsiialyq faktor boldy. Ol jalpy infliatsiiadaǵy úlestiń jartysyn ielenedi. Azyq-túlik infliatsiiasy ýaqytsha jáne barynsha ornyqty faktorlardyń áserinen sońǵy 5 aida alǵashqy ret baiaýlap biylǵy qazanda 11,5-ten 11,3 paiyzǵa deiin tómendedi. Biylǵy shilde-tamyzda uzaq saqtalatyn kókónister baǵasynyń jaz ailaryna tán emes jáne sońǵy jyldardaǵy rekordtyq ósýi tirkeldi», - dedi «2022-2024 jyldarǵa arnalǵan respýblikalyq biýdjet týraly» baiandaǵan Erbolat Dosaev.
Ulttyq bank dereginshe, et, ósimdik maiy jáne qant baǵasynyń ósýi infliatsiiany jedeldetýdiń turaqty faktory bolyp qalýda.
Muny ósim deńgeii boiynsha álemdik trendtermen salystyrýǵa bolady.
FAO derekterine sáikes bir jylda ettiń álemdik baǵasy orta eseppen - 22,1, ósimdik maiynyń baǵasy – 73,6, qanttyń baǵasy – 40,6 paiyzǵa ósti.
«Qazaqstanda azyq-túlikke jatpaityn infliatsiia, birinshi kezekte, tutynýshylyq belsendiliktiń qalpyna kelýi aiasynda janar-jaǵar mai jáne uzaq paidalanylatyn taýarlar baǵasynyń ósýi nátijesinde jyldamdady. Aqyly qyzmetter infliatsiiasy negizinen elektr energiiasy, turǵyn úidi jaldaý jáne kólik qyzmetteri baǵasynyń ósýi esebinen jyldamdady», - dedi ol.
