Jeke tulǵalarǵa azyq-túlik pen turmystyq taýarlardy satqan dúkender baqylaý-kassa mashinasynyń chegin berýge mindetti. Al osy jaǵdaida dúken iesi taýarlarǵa ilespe júkqujattaryn rásimdeýge mindetti me? Temeki ónimderin satýshylar 2D skanerin satyp almaýy úshin neni bilýi kerek? Osy suraqtarǵa Memlekettik kirister komitetinde jaýap berdi, dep habarlaidy "Ult aqparat".
Jyl basynan bastap Taýarlarǵa ilespe júkqujattardy kezeń-kezeńimen engizýdi kózdeitin pilottyq joba iske qosyldy.
Jeke tulǵalarǵa azyq-túlik pen turmystyq taýarlardy ótkizý kezinde baqylaý-kassa mashinasynyń chegi beriledi. Mańyzdy: taýarlarǵa ilespe júkqujattar rásimdelmeidi.
Satyp alýshylar 14 kún ishinde satyp alynǵan taýardy qaitarýǵa quqyly ekenin eskere otyryp, Virtýaldy qoimadan satylǵan taýar 16 kúntizbelik kúninde esepten shyǵarylady. Esepten shyǵarý EShF aqparattyq júiesinde baqylaý-kassa mashinalary chekteriniń derekteri negizinde avtomatty túrde júrgiziledi.
Sonymen qatar, alkogol men temekini bólshek saýdada ótkizýshiler úshin (dúkender, sýpermarketter, meiramhanalar, barlar jáne t.b.) jetkizýshiden taýar alǵan kezde «Elektrondy shot-faktýralar» aqparattyq júiesinde taýarlarǵa ilespe júkqujattardy rastaý túrinde qosymsha talap bar. Odan ári satý kezinde taýarlarǵa ilespe júkqujattar tek erikti negizde rásimdeledi.
Temeki ónimderin satý úshin 2D skanerge balama retinde «Naqty Sauda» (Android jáne IOS) tegin mobildi qosymshasyn paidalanýǵa bolady.
Kásipkerlerdi qoldaý jáne máselelerdi talqylaý úshin «MarkirovkaQoldau» Telegram-chaty belsendi jumys isteidi.
Taýarlardy tańbalaý máseleleri boiynsha táýlik boiy tegin «shuǵyl» jeli jumys isteidi, onyń nómiri mynadai - 8 800 080 6565.
