Elimizde azyq óndirisin damytý jónindegi jol kartasy ázirlenedi. Bul týraly Úkimet otyrysynda QR Aýyl sharýashylyǵy birinshi vitse-ministri Aidarbek Saparov aitty, dep habarlaidy QazAqparat.
«Infliatsiiaǵa qarsy den qoiý sharalarynyń kesheni jobasynda ministrik 11 jedel merzimdi jáne 8 orta merzimdi is-sharalardy oryndaidy. Bul - áleýmettik mańyzy bar azyq-túlik taýarlaryn óndirý úshin basym daqyldardyń egis alańdaryn, kókónis saqtaý qýatyn kóbeitý is-sharalaryn qabyldaý. Shikizat qoryn damytý úshin «Azyq-túlik kelisimshart korporatsiiasy» UK» AQ negizinde turaqty jumys isteitin jemdik astyq qoryn qalyptastyrýdy, sondai-aq, jemdik astyq jáne iri azyqty áketýge ýaqytsha sandyq shekteýler nemese tyiym salýdy kózdeitin Azyq óndirisin damytý jónindegi jol kartasy ázirlenetin bolady», - dedi ol.
Birinshi vitse-ministrdiń atap ótýinshe, baǵany turaqtandyrý úshin eń aldymen, boljam negizinde baǵanyń eń kóp ósýi kútiletin taýarlardyń naqty túrlerin satyp alý maqsatynda turaqtandyrý qorlarynyń jumys printsipin qaita qaraý qajet.
«Maýsymaralyq kezeńde óńirlerdiń turaqtandyrý qorlarynda kartop, sábiz, qyryqqabat jáne piiaz boiynsha qala halqy, qaraqumyq jarmasy men kúnbaǵys maiy boiynsha búkil halyq qajettiliginiń 30 paiyzy kóleminde 5 ailyq qor qalyptastyrý usynylady. Respýblika boiynsha kartop pen kókónisterdi satyp alý kólemi 229 myń tonnany, sondai-aq qaraqumyq jarmasy 17,6 myń tonnany jáne kúnbaǵys maiy 28,5 myń tonnany quraidy», - dedi Aidarbek Saparov.
Onyń aitýynsha, daiyn ónimdi alý úshin «Azyq-túlik kelisim shart korporatsiiasy» UK» AQ josparlanǵan turaqtandyrý qorlarynyń 10 paiyz mólsherinde kúnbaǵys pen qaraqumyqtyń qosymsha kólemin, sondai-aq shamamen 4 myń tonna qant qoryn qalyptastyrady.
«Bul rette, Azyq-túlik korporatsiiasymen forvardtyq satyp alý aiasynda 9 150 tonna kúnbaǵys pen 691 tonna qaraqumyqqa kelisimshart jasaldy. Qaraqumyq, kúnbaǵys, qanttyń qalǵan kólemi naryqta tikelei satyp alý jolymen alynady», - dedi ol.
