Qazaqstan quramasy Indoneziiada ótip jatqan jazǵy Aziia oiyndarynda taǵy bir medal enshiledi, dep habarlaidy "Ult aqparat" QR Ulttyq Olimpiada komitetine silteme jasap.
Palembangtaǵy finaldyq kezeńde baidarka men kanoede eskek esýshiler kúmis júldege qol jetkizdi. Ilia Golendov pen Andrei Ergýchev 1000 metrge eki adam bolyp jarysýda baq synaǵan bolatyn. Qazaqstandyq sportshylardyń aldyn qytailyqtar orap ketti.
I. Golendov pen A. Ergýchev jubynyń kórsetkishi - 3.23.815. Al altyn júlde alǵan Qytai komandasynyń ýaqyt kórsetkishi - 3.23.601.
Qola júlde Ózbekstan komandasynyń enshisinde.
Eske sala keteiik, búgin tańerteń tórt adamdyq synda Qazaqstan komandasy altyn medalǵa ie bolǵan edi.
Sondai-aq habarlanǵandai, baidarka men kanoede eskek esýden áielder arasyndaǵy jarysta Anastasiia Berezovskaia (500 metrge jarysýdan) máre syzyǵyn 6-shy bolyp kesip ótti. Bul synda Qytai, Iran jáne Ońtústik Koreia sportshylary top jardy.
30 tamyz kúni Ulttyq qurama sporttyń 9 túrinen baq synaidy.
