Aziia qalamgerlerine ortaq ádebi jýrnal ashý qajet. Elordada ótip jatqan Aziia elderi qalamgerleriniń tuńǵysh forýmynda Tájikstannyń halyq aqyny Gýlnazar Keldiev osyndai usynys jasady, dep habarlaidy QazAqparat.
«Keńes odaǵy zamanynda Afrika men Aziia jazýshylarynyń yntymaqtastyq komiteti bolǵan edi. Sol kezde biz jinalyp, sóz bostandyǵy, táýelsizdik, halyqtardyń sana-sezimi jaiynda aityp, jeńiske jettik. Kóptegen memleket táýelsizdigin aldy. Bul búil álemdegi uly qozǵalys bolatyn. Biraq KSRO kúiregennen keiin bizde mundai basymyzdy biriktiretin organ bolmady. Osy oraida bizdiń qazaq baýyrlarymyz bul baǵytta ilgeri jyljyp, qýantyp otyr. Jahandaný jaǵdaiynda bul óte mańyzdy», - dedi tájik aqyny QazAqparat tilshisine bergen suhbatynda.
Sonymen qatar ol forýmnyń ashylý rásimine Qazaqstan Prezidenti Qasym-Jomart Toqaevtyń Aziia memleketteriniń mundai forýmyn turaqty ótkizip turý jáne «Aziia alyby» syilyǵyn taǵaiyndaý usynystaryna qoldaý bildirdi.
«Osyǵan bailanysty bizdiń ortaq jýrnalymyzdy shyǵarý qajet. Onda shyǵarmalarymyzdy bárimizge qoljetimdi tilde jariialap otyrǵan jón. Máselen, aǵylshyn, orys jáne arab tilderin tańdaýǵa bolady. Bul bizdiń jas avtorlarymyzdyń tanymaldyǵyn arttyrýǵa septigin tigizer edi. Biriktirýshi qozǵalys búgingi syn-tegeýirinder men problemalardy, onyń ishinde álemde oryn alyp jatqan zulymdyqtar men qantógisterdi sheshý úshin de qajet. Óitkeni, munai tereń ári ótkir problemalardy sheshýge rýhani damý ǵana óz septigin tigize alady», - dedi Gúlnazar Keldiev.
