Foto: QR Aýyr atletika federatsiiasy
Astanada ótip jatqan jastar men jasóspirimder arasyndaǵy aýyr atletikadan Aziia chempionatynda qazaqstandyq jas sportshylar el qorjynyna mol olja salýda. Búgingi kúnge deiin ulttyq quramanyń enshisinde 18 altyn, 6 kúmis jáne 12 qola medal bar, dep habarlaidy Ult.kz.
88 kelige deiingi salmaqta synǵa túsken 19 jastaǵy Erasyl Saýlebekov úsh altyn júldeni jeńip aldy. Ol julqa kóterýde — 153 keli, serpede — 191 keli kóterip, qos saiys nátijesinde 344 kelige qol jetkizdi.
Al 71 keli salmaqta óner kórsetken, 17 jasqa deiingi sanattaǵy Álihan Áskerbai de qarsylastarynan oq boiy ozyp, úsh altyn medal enshiledi — julqa kóterýde 141 keli, serpede 169 keli.
Edige Emberdi Aziia chempionatynyń jańa rekordyn ornatyp, julqa kóterýde — 153 keli, serpede — 194 keli kóterip, úsh altyn medal ielendi.
15 jastaǵy Kseniia Prozorova da joǵary nátijesimen kózge túsip, Aziia rekordyna teń kórsetkishke jetip, Qytai men Ózbekstan sportshylaryn artta qaldyrdy.
Buǵan deiin 69 kelige deiingi salmaqta Kira Danilova absoliýtti chempion atanǵan bolatyn.
Qazaqstan quramasy jarystyń alǵashqy kúnderinen-aq óz ústemdigin baiqatyp, qurlyq birinshiliginde úzdik nátije kórsetýde. Chempionat áli jalǵasýda.
