Resei ishki ister ministrligi belorýs azamattyǵy bar tegi ázerbaijan stendap-komik Idrak Mirzalizadeniń Reseige kirýine ómir boiy tyiym saldy. Orystar týraly ázil aityp, 10 táýlikke qamalǵan ol endi Resei aýmaǵyna múlde kire almaidy. Bul jóninde Resei ishki ister ministrliginiń saitynda aitylǵan, dep jazady Azattyq.
Mekeme habarlamasynda "Mirzalizade orys ulty ókilderine jekkórinish týdyryp, olarǵa degen óshpendilikti arttyratyn sózder aitty" delingen. Sondyqtan onyń Resei aýmaǵynda bolýy qoǵamdyq tártipke qater tóndiredi.
Ázilkesh tamyzdyń basynda on táýlikke qamalǵan. Buǵan onyń 2021 jylǵy naýryzda "Razgony" habaryndaǵy aitqan sózi túrtki bolǵan. Onda Mirazalizade ksenofobiia máselesin qozǵap, Máskeýde páter jaldaý kezinde slavian emes adamdar qandai qiyndyqqa tap bolatynyn ázilmen aityp bergen. Osy taqyryp jaiyndaǵy taǵy bir qoiylymynda ol orystar týraly aitqan.
Mirzalizade tutqyndalardan buryn da, bosap shyqqannan keiin de bul qaljyńy úshin keshirim suraǵan. Istegen isi úshin qatty ókinetinin aitqan ol bul sózi "konteksten alynǵanyn" jáne "daiyn emes adamǵa jaman áser etetinin" aitqan.
Mihail Shats, Danila Poperechnyi, Ilia Sobolev jáne basqa da ázilkeshter ony qoldap video túsirdi, onda olar Mirzalizade ksenofobiiany jaqtaǵan joq, qaita oǵan qarsylyq bildirdi degen oi aitady. "Ázili úshin túrmege qamaý – ǵylymi teoriiasy úshin órteýdiń aldyndaǵy sońǵy qadamdardyń biri" delingen olardyń málimdemesinde. Ázilkeshter áriptesin qoldaý maqsatynda kontsert te bergen.
- Tamyzda Reseidiń "Edinaia Rossiia" partiiasy elge rýsofobtardyń kirýine tyiym salatyn zań jobasyn jariialady. Qujatta jekkórinish pen óshpendilik týǵyzatyn, SSSR týraly jalǵan málimet taratatyn jáne natsisterdiń qylmysyn qoldaityn adamdardy Reseige kirgizbeý týraly aitylǵan.
- Buǵan qosa, tamyz aitynda Resei ishki ister ministri Qazaqstan azamaty Qýat Ahmetovtiń Reseige kirýine 50 jylǵa tyiym saldy. Ol – belsendiler azamattardan qazaq tilinde sóileýdi talap etetin Youtube-arnanyń avtory.
