Atyraýlyq Ainur Qanatova balalarymen týystarynyń úiin panalap júr eken. Byltyr joldasymen zań júzinde ajyrasyp, nátijesinde sot múlikterin teńdei bólip bergen. Biraq kúieýi sot sheshimine qaramai, balalaryna da qimai, baspanasyn traktormen kúrep tastaǵan.
Irgetasy qalanǵanyna 10 jyl da bolmaǵan úlken úidiń tas-talqany shyqqan. Tipti aýladaǵy shaǵyn úi men garajdy da qiratyp tastaǵan. Áiel bul jaǵdai byltyr bolǵanyn, buzyp bastaǵanda politsiiaǵa da habarlaǵanyn aitty. Onyń aitýynsha, kúieýi sot sheshimi shyqqan boida úidi buzýǵa jumysshylar jaldaǵan. Súrip tastamas buryn úidiń shatyry men esik-terezesin túsirip alǵan.
"Sot sheshimine de, eshnársege qaramaidy. Bul ne qylǵan bassyzdyq! Atyraýda, Atyraý oblysynda zań bar ma? Qazir kishkentai balalarymmen týysqandarymnyń úiin panalap júrgenime bir jarym jyl boldy", - deidi ol.
38 jastaǵy kelinshektiń aitýynsha, osydan segiz jyl buryn bir balasymen ózinen 18 jas úlken azamatqa turmysqa shyqqan. Ol kúieýinen eki uly bar. Otbasylyq aiqai-shý úlken ulyn jaqtyrmaýdan bastalǵan eken. Ata-anasy bar kezde uly solardyń qolynda bolǵan. Keiin anasy qaitys bolyp, balany óz qolyna alǵan. Onyń sózinshe, kúieýi ulyn baýyryna baspaq túgil, boqtap-balaǵattap, qysym kórsetken. Sonymen qatar, buryn politsiiada qyzmet atqarǵan qaiyn inisi ózine kúsh kórsetkende, úiden ketýge májbúr bolǵan eken.
"Qoryqqannan májbúr boldym. Kettim, úsh balamen. Sharbaqqa qainym keldi. Buryn ishki ister qyzmetkeri bolǵan. Politsiiada istegen. Sharbaqtyń ishinde meni jerge qulatyp, keýdemnen tizesimen basyp aldy. Úlken ulymnyń telefonyn tartyp alǵan. Sebebi telefonda balamdy balaǵattaǵan, aýyr sózder aitqan jazbalar bar edi. Sony qurtý kerek boldy", - deidi Ainur.
Er adamnyń áreketin tártip saqshylary tekserip jatyr.
"QR Qylmystyq kodeksiniń 389-baby 1-bóligi boiynsha sotaldy tergep-tekserý júrgizilip jatyr. Tekseris 2022 jylǵy 19 sáýirde bastaldy. Qazir qylmystyq is tergeý satysynda", - dedi Atyraý oblysy PD anyqtaý basqarmasynyń aǵa anyqtaýshysy Eldos Tuqpatov.
