اتىراۋلىق اينۇر قاناتوۆا بالالارىمەن تۋىستارىنىڭ ٷيٸن پانالاپ جٷر ەكەن. بىلتىر جولداسىمەن زاڭ جٷزٸندە اجىراسىپ, نەتيجەسٸندە سوت مٷلٸكتەرٸن تەڭدەي بٶلٸپ بەرگەن. بٸراق كٷيەۋٸ سوت شەشٸمٸنە قاراماي, بالالارىنا دا قيماي, باسپاناسىن تراكتورمەن كٷرەپ تاستاعان.
ٸرگەتاسى قالانعانىنا 10 جىل دا بولماعان ٷلكەن ٷيدٸڭ تاس-تالقانى شىققان. تٸپتٸ اۋلاداعى شاعىن ٷي مەن گاراجدى دا قيراتىپ تاستاعان. ەيەل بۇل جاعداي بىلتىر بولعانىن, بۇزىپ باستاعاندا پوليتسيياعا دا حابارلاعانىن ايتتى. ونىڭ ايتۋىنشا, كٷيەۋٸ سوت شەشٸمٸ شىققان بويدا ٷيدٸ بۇزۋعا جۇمىسشىلار جالداعان. سٷرٸپ تاستاماس بۇرىن ٷيدٸڭ شاتىرى مەن ەسٸك-تەرەزەسٸن تٷسٸرٸپ العان.
"سوت شەشٸمٸنە دە, ەشنەرسەگە قارامايدى. بۇل نە قىلعان باسسىزدىق! اتىراۋدا, اتىراۋ وبلىسىندا زاڭ بار ما? قازٸر كٸشكەنتاي بالالارىممەن تۋىسقاندارىمنىڭ ٷيٸن پانالاپ جٷرگەنٸمە بٸر جارىم جىل بولدى", - دەيدٸ ول.
38 جاستاعى كەلٸنشەكتٸڭ ايتۋىنشا, وسىدان سەگٸز جىل بۇرىن بٸر بالاسىمەن ٶزٸنەن 18 جاس ٷلكەن ازاماتقا تۇرمىسقا شىققان. ول كٷيەۋٸنەن ەكٸ ۇلى بار. وتباسىلىق ايقاي-شۋ ٷلكەن ۇلىن جاقتىرماۋدان باستالعان ەكەن. اتا-اناسى بار كەزدە ۇلى سولاردىڭ قولىندا بولعان. كەيٸن اناسى قايتىس بولىپ, بالانى ٶز قولىنا العان. ونىڭ سٶزٸنشە, كٷيەۋٸ ۇلىن باۋىرىنا باسپاق تٷگٸل, بوقتاپ-بالاعاتتاپ, قىسىم كٶرسەتكەن. سونىمەن قاتار, بۇرىن پوليتسييادا قىزمەت اتقارعان قايىن ٸنٸسٸ ٶزٸنە كٷش كٶرسەتكەندە, ٷيدەن كەتۋگە مەجبٷر بولعان ەكەن.
"قورىققاننان مەجبٷر بولدىم. كەتتٸم, ٷش بالامەن. شارباققا قاينىم كەلدٸ. بۇرىن ٸشكٸ ٸستەر قىزمەتكەرٸ بولعان. پوليتسييادا ٸستەگەن. شارباقتىڭ ٸشٸندە مەنٸ جەرگە قۇلاتىپ, كەۋدەمنەن تٸزەسٸمەن باسىپ الدى. ٷلكەن ۇلىمنىڭ تەلەفونىن تارتىپ العان. سەبەبٸ تەلەفوندا بالامدى بالاعاتتاعان, اۋىر سٶزدەر ايتقان جازبالار بار ەدٸ. سونى قۇرتۋ كەرەك بولدى", - دەيدٸ اينۇر.
ەر ادامنىڭ ەرەكەتٸن تەرتٸپ ساقشىلارى تەكسەرٸپ جاتىر.
"قر قىلمىستىق كودەكسٸنٸڭ 389-بابى 1-بٶلٸگٸ بويىنشا سوتالدى تەرگەپ-تەكسەرۋ جٷرگٸزٸلٸپ جاتىر. تەكسەرٸس 2022 جىلعى 19 سەۋٸردە باستالدى. قازٸر قىلمىستىق ٸس تەرگەۋ ساتىسىندا", - دەدٸ اتىراۋ وبلىسى پد انىقتاۋ باسقارماسىنىڭ اعا انىقتاۋشىسى ەلدوس تۇقپاتوۆ.
