Almatyda 18 jastaǵy jasóspirim óz ájesin óltirgeni úshin sottaldy, - dep habarlaidy Tengrinews.kz agenttigi.
Qalalyq prokýratýra málimetinshe, 2020 jyldyń qarashasynda Medeý aýdanyndaǵy jeke úilerdiń birinde órt shyqqan. Oqiǵa ornynda áieldiń denesi tabylady. Sot-meditsinalyq saraptama ólim jedel júrek-qan tamyrlary jáne tynys alý jetkiliksizdigi saldarynan bolǵanyn kórsetti. Buǵan tok soǵýy sebep bolǵan.
Saraptama qorytyndysy boiynsha, órttiń shyǵýyna elektr uzartqyshynyń apatty jaǵdaida jumys isteýi sebep bolǵan. Barlyq saraptama qorytyndysyn eskere otyryp, qylmys quramynyń bolmaýyna bailanysty isti tergeý toqtatylǵan.
"Alaida keiin qylmystyq is materialdaryn zerdelep, marqumnyń týystarynyń ýájin baǵalaǵan prokýrorlar qosymsha tergeý jumystaryn bastady. Qadaǵalaý organynyń nusqaýymen máiit eksgýmatsiialanyp, sot-meditsinalyq saraptama komissiiasy taǵaiyndaldy. Sondai-aq, basqa da birqatar tergeý áreketi júrgizildi", - dedi prokýratýra ókilderi.
Qosymsha saraptama áieldiń ólimine qylqyndyrý kezindegi mehanikalyq asfiksiia sebep bolǵanyn kórsetti.
"Marqumnyń 18 jastaǵy nemeresi qasaqana kisi óltirdi degen kúdikke ilingen, ol óz kinásin moiyndap, sol kúni otbasylyq janjal kezinde ájesin qylqyndyryp óltirgenin aitty. Úidegi aqsha men zergerlik buiymdardy iemdenip, qylmystyń izin jasyrý úshin qasaqana órt shyǵarǵan", - dedi qadaǵalaý organy ókilderi.
Sot úkimi boiynsha aiyptalýshy adam óltirgeni jáne múlkin urlaǵany úshin kináli dep tanyldy. Ol 12 jyl alty aiǵa bas bostandyǵynan aiyryldy. Úkim zańdy kúshine engen joq.
