QR Densaýlyq saqtaý vitse-ministri Ajar Ǵiniiat Qaraǵandy oblysyndaǵy birqatar meditsinalyq nysandardy aralady. Ol koronavirýstyń ekinshi tolqynyna daiyndyq barysyn tekserdi, dep habarlaidy "Ult aqparat" QR Densaýlyq saqtaý ministrliginiń baspasóz qyzmetine silteme jasap.
Ajar Ǵiniiat aldymen Qaraǵandydaǵy №3 emhananyń jumysymen tanysty. Qajetti qurylǵylardy, tonometrler men teplovizorlardy tekserdi. Aita ketken jón, onyń balalar dárigeri bolyp jumys istegeni málim. Sondyqtan, osy mekemedegi balalardy tamaqtandyrý jóninde ótip jatqan sheberlik sabaǵyna qyzyǵýshylyq bildirip, mamandarmen tildesti. Sonymen qatar, vitse-ministrge jańa týǵan nárestelerdiń estý qabiletin tekseretin apparatty jáne balalardy damytý bólmesin tanystyrdy.
Osydan soń Ajar Ǵiniiat Oblystyq juqpaly aýrýlar aýrýhanasyndaǵy infektsiialyq-provizorlyq gospitalinde bolyp, emdeý bólimshelerin kórdi. Sondai-aq, H.J.Maqajanov atyndaǵy infektsiialyq gospitaldiń jumysyn qadaǵalady. Bul mekeme pandemiia kezinde qurylǵan.
Ajar Ǵiniiat sitýatsiialyq ortalyqta da boldy. Oǵan koronavirýstyq infektsiiaǵa monitoring jasaityn qurylǵylar kórsetildi.
Sonymen birge, jedel shtabtyń jumysy baiandaldy. Munda da jedel járdem habarlamalaryna jáne tumaý maýsymyna monitoring júrgiziledi jáne naýqastardy aýrýhanaǵa jetkizý barysy pysyqtalady.
Jumys qorytyndysy boiynsha vitse-ministr Oblystyq Densaýlyq saqtaý basqarmasynda jiyn ótkizdi.
-Dárigerdiń qoǵamdaǵy róli joǵary baǵalana bastady. Medqyzmetkerlerdiń bedeli artty. Prezidenttiń ózi airyqsha nazar aýdarýda. Joǵary jalaqy taǵaiyndady,- dedi ol.
Jalpy alǵanda Qaraǵandy oblysy indettiń ekinshi tolqynyna daiyn,- dep túiindedi vitse-ministr.
