Altynshy shaqyrylǵan Ázerbaijannyń Milli Medjlisiniń birinshi otyrysynda Parlament tóraǵasy bolyp Sahibý Ali gyzy Gafarova sailandy, dep habarlaidy ÁZERTADJ agenttigi.
Onyń kandidatýrasyn «Jańa Ázerbaijan» basqarýshy partiiasy usyndy, onyń ókilderi 9 aqpan kúni ótken kezekten tys sailaýda zań shyǵarýshy organǵa 125 mandattyń 70-in jeńip aldy.
Gafarovany qoldap 116 depýtat daýys berdi. Aita ketken jón, táýelsizdik alǵan jyldar ishinde el parlamentin alǵash ret áiel basqaryp otyr.
Buǵan deiin Gafarova Milli Medjlistiń tórtinshi jáne besinshi shaqyrylymynyń depýtaty bolyp sailandy. Eýropa Keńesiniń Parlamenttik Assambleiasynda Ázerbaijan delegatsiiasynyń quramyna kirdi.
