QR Indýstriia jáne infraqurylymdyq damý ministrligi Azamattyq aviatsiia komiteti Qazaqstandaǵy áýe biletteriniń qymbattyǵyn túsindirdi, dep habarlaidy QazAqparat.
«Qazirgi ýaqytta Memleket basshysynyń Joldaýyn júzege asyrý boiynsha Jalpyulttyq sharalar jospary ázirlenip jatyr. Onyń ishinde aviabiletterdiń qymbattyǵy týraly syn aitylǵan bolatyn. Biletterdiń qymbat bolýynyń negizgi sebebi ushaq sanynyń jetispeýi jáne aviaotyn qunynyń qymbattyǵy bolyp otyr. Tarif qunyn tómendetý úshin biyl 1 mamyrda «FlyArystan» otandyq loýkosteri iske qosyldy. Eki aida 340 myńnan astam bilet satyldy, onyń jartysyna jýyǵy 10 myń teńgeden tómen baǵaǵa satylǵan», - dedi Azamattyq aviatsiia komitetiniń tóraǵasy Aibek Áljanov QR Indýstriia jáne infraqurylymdyq damý ministrliginde ótken brifingte.
Onyń aitýynsha, bilet qunynyń qymbattyǵy máselesin túbegeili sheshý úshin Úkimet «Samuryq-Qazyna» AQ birlesip, áýe parkin keńeitý maqsatynda «Air Astana» jáne Qazaq Air syndy áýe kompaniialaryn qosymsha kapitaldandyrýdy josparlaýda.
«Áýe tasymalynyń ózindik qunynda áýejai qyzmeti shyǵyndary - 11%, asa kóp emes. Ózge memlekettik organdarmen, atap aitqanda Energetika ministrligimen aviaotyn baǵasyn túsirý jumystary jalǵasady. Ázirge úsh munai óńdeý zaýytyn jańǵyrtqan soń, suranys tolyq qanaǵattandyryldy. Resei otynyna táýeldilikti azaittyq, bul Qazaqstandaǵy otyn baǵasyn tómendetýge yqpal etti», - dedi A. Áljanov.
