Memleket basshysy Úkimettiń keńeitilgen otyrysyn ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Prezident Qasym-Jomart Toqaevtyń tóraǵalyǵymen Úkimettiń keńeitilgen otyrysy beinebailanys rejiminde ótti. Is-sharaǵa Premer-ministr Álihan Smaiylov, Memlekettik keńesshi Erlan Qarin, Prezident Ákimshiliginiń basshylyǵy, Úkimet músheleri, oblystardyń, Nur-Sultan, Almaty, Shymkent qalalarynyń ákimderi, ortalyq memlekettik organdar men ulttyq kompaniialardyń basshylary qatysty.
Memleket basshysy elimizdiń kúrdeli geosaiasi syn-qaterlerge qaramastan, birqalypty damyp kele jatqanyn atap ótti. Biylǵy birinshi jartyjyldyqtyń qorytyndysy boiynsha ekonomika 3,4 paiyzǵa, al naqty sektor 4,1 paiyzǵa ósken. Ásirese, óńdeý ónerkásibi salasynda aitarlyqtai ilgerileý bar.
– Infliatsiia bir orynda turǵan joq. Qazir bul kórsetkish 14,5 paiyzǵa jetip, 2015 jylǵy deńgeiden asyp tústi. Birinshi jartyjyldyqta ekonomikamyz qalpyna keldi. Biraq halyqaralyq institýttar Qazaqstannyń ishki jalpy ónimi biyl 2 paiyzǵa ǵana ósedi dep boljap otyr. Buǵan deiin olar ósim 3,7 paiyz bolatynyn aitqan edi. Sondyqtan Úkimet el ekonomikasynyń ornyqty damýyn qamtamasyz etýge tiis. Eń bastysy, azamattardyń naqty tabysyn arttyrý qajet, – dedi Prezident.
Otyrys barysynda Qasym-Jomart Toqaev Úkimet músheleri men óńirler ákimderiniń nazaryn halyqty alańdatqan birqatar ózekti máseleni sheshý qajettigine aýdardy. Prezident infliatsiiany jáne azyq-túlik taýarlarynyń baǵasyn turaqtandyrý, azamattardyń tabysyn arttyrý jáne adami kapitaldy damytý, aqsha-nesie jáne salyqtyq-biýdjet saiasatyn jetildirý, ekonomikanyń naqty sektoryna qoldaý kórsetý, energetikalyq qaýipsizdikti qamtamasyz etý, avtojol infraqurylymyn damytý siiaqty máseleler boiynsha naqty mindetter júktedi.
Memleket basshysy Premer-ministr Álihan Smaiylovtyń jáne Ulttyq bank tóraǵasy Ǵalymjan Pirmatovtyń baiandamalaryn tyńdap, Úkimet jumysynyń nátijesine ortasha baǵa berdi.
Prezident ministrler men ákimderge, vedomstvolar men ulttyq kompaniialardyń basshylaryna jumys qarqynyn barynsha kúsheitip, jańa ádister men tyń ideialardy paidalaný qajet ekenin aitty. Sonymen qatar olarǵa elimizdiń áleýmettik-ekonomikalyq damýyna qatysty birqatar mindet júktedi.
Jiyn barysynda Memleket basshysy Premer-ministrdiń orynbasary – Saýda jáne integratsiia ministri Baqyt Sultanovqa, Aýyl sharýashylyǵy ministri Erbol Qarashókeevke, Ekologiia, geologiia jáne tabiǵi resýrstar ministri Serikqali Brekeshevke sógis jariialady, sondai-aq Tsifrlyq damý, innovatsiialar jáne aeroǵarysh ónerkásibi ministri Baǵdat Mýsinge eskertý jasady.
