Qazaqstandyq aktrisa, prodiýser, rejisser, “Daryn” memlekettik jastar syilyǵy men “Tarlan” táýelsiz syilyǵynyń laýreaty Nazgúl Qarabalina jeke ómirine qatysty kópshilik bile bermeitin jaittardy bólisti, dep habarlaidy ult.kz.
Muhtar Áýezov atyndaǵy Qazaq ulttyq drama teatrynyń aktrisasy eń aldymen otbasyna qatysty orynsyz suraq qoiatyn adamdardyń áreketine qynjylatynyn aitty. Onyń sózinshe, ásirese “Nege bir-aq bala súidińiz?” degen saýal jii qoiylady.
“Maǵan “Nege bir baladan artyq týmadyń?” dep suraityn adamdardy qalai atarymdy bilmeimin. Muny nadandyq pa, álde bilimsizdik pe deýge bolady. Qudaidyń bergenine qarsy kele almaimyz ǵoi. Bir ulymyz bar, soǵan shúkirshilik etemiz. Maǵan jaqyn adamdar ondai jeke suraq qoimaidy. Kerisinshe, alystaý tanystarym ómirimniń bárin bilgisi keledi”, – dedi aktrisa.
Suhbat barysynda Nazgúl Qarabalina alǵashqy kúieýi Azamatqa alǵash bolyp ózi ǵashyq bolǵanyn da jasyrmady. Onyń aitýynsha, stýdenttik shaǵynda Azamat oǵan birden kóńil aýdarmaǵan.
“Shynyn aitsam, akademiiada oqyp júrgende Azamat meni onsha unatqan joq. Al alǵash ǵashyq bolǵan – men edim. Onyń nazaryn aýdarsam, meni baiqasa eken dep armandaitynmyn”, – dep eske aldy óner iesi.
Aktrisa sol kezeńde súiiktisine arnap arnaiy albom júrgizgenin de aitty. Onda ol Alladan ekeýiniń taǵdyryn qosýdy tilep, bolashaqta Azamattyń ata-anasyna qamqor bolyp, kópbalaly áýletimen tatý-tátti ómir súrýge niet etkenin jazǵan.
“Ol kezde Azamat basqa qyzdy unatatyn. Men kúndeligime: “Ýa, Alla! Eger Azamat maǵan nazar aýdaryp, biz otbasyn qursaq, onyń zeinetker ata-anasyna qamqor bolamyn. Toǵyz baýyrymen de jaqsy qarym-qatynasta bolamyn. Tek bizdi qosa gór”, – dep tileitinmin”, – dedi ol.
Nazgúl Qarabalinanyń aitýynsha, keiin Azamat álgi jazbalardy kezdeisoq oqyp qoiǵan. Aktrisa osy oqiǵadan keiin onyń kózqarasy ózgergen bolýy múmkin ekenin aitty.
“Bir kúni Azamat sol jazbalardy oqyp qoiypty. Sodan keiin oilanǵan shyǵar. Meniń sezimim shynaiy boldy. Al ol bastapqyda eseppen úilendi. Qazir, árine, jaqsy kóredi”, – dep túiindedi aktrisa.
