Belgili akter, Qazaqstannyń eńbek sińirgen qairatkeri Azamat Satybaldy Prezidenttiń mádeniet qyzmetkerleriniń ailyǵyn kóterý bastamasyna óner adamdary úlken úmitpen qarap otyrǵanyn aitady, dep habarlaidy QazAqparat.
«Bul bastamany men óte sátti qadam dep qabyldadym. Qasym-Jomart Kemelulynyń óz Joldaýynda mádeniet qyzmetkerleriniń jaǵdaiyn kóterýiniń ózi – úlken jetistik, mádeniet pen ádebietke úlken qamqorlyǵy dep bilem. Qalai aitsaq ta, eldiń damýynyń birden-bir kórsetkishi – mádeniet pen ádebiet. Ol sala aqsamai, ózgemen qatar júrýi kerek. Teatrda jaǵdaidyń ońai emes ekenin bilemiz. Teatr qyzmetkerleriniń ailyǵy tómen ekeni eshkimge qupiia emes. Mine, osy kezde óner adamdarynyń ailyǵynyń ósetini jaily Prezident tapsyrmasy dátke qýat boldy. Shóldegende berilgen sý ispettes óner adamdarynda úmit týdy», - dedi Ǵ.Músirepov atyndaǵy Qazaq memlekettik akademiialyq balalar men jasóspirimder teatrynyń direktory Azamat Satybaldy.
Dese de, Azamat Satybaldynyń aitýynsha, mádeniet qyzmetkerleriniń máselesi jalaqymen shektelmeidi.
«Qordalanyp qalǵan problemalar barshylyq. Meniń oiymsha, eń bastysy birinshi qadam jasaldy. Ailyqty kóteremiz dedi. Alǵashqy qadam jasalǵannan keiin de basqa da problemalarǵa nazar aýdaryla jatar. Bul jańalyqqa árbir teatral áriptesterimniń bári qýanyp jatyr. Ailyqtyń kóterilýi bir ǵana teatr qyzmetkeriniń qýanyshy emes – onyń otbasynyń jaily jańalyǵy. Ol aqshasyn otbasyna aparady. Ailyqpen birge ol otbasynyń áleýmettik jaǵdaiy da kóteriledi. Sol úshin biz óte qýanyshtymyz. Teatrdyń aktery eshýaqytta syrtqa qarailamaý kerek, toi-tomalaqty jaǵalamaýy tiis. Kontsertke barmai, ónermen ainalysýy kerek», - dedi ol.
Azamat Satybaldy teatr aktery taza ónermen ainalysý úshin qaryny toq, kóilegi kók bolý kerek dep pikir bildirdi.
«Otbasynda ymyra, tynyshtyq bolýy tiis. Sol úshin ailyq kóbirek berse jaqsy bolar edi degen úmitimiz bar. Bolashaqta mádeniet qyzmetkerleriniń jaǵdaiy jasala berse quba-qup», - dedi ol.
Eske sala ketsek, kúni keshe Qazaqstan halqyna Joldaýyn jariialaǵan Memleket basshysy Qasym-Jomart Toqaev Úkimetke mádeniet salasynyń qyzmetkerleriniń ailyǵyn kóterýdi tapsyrǵan bolatyn.
«Mádeniet qyzmetkerlerin qoldaý qajet. Biz mádeniet salasynda eńbek etetin adamdarǵa jetkilikti túrde kóńil bólmei otyrmyz. Bul eń aldymen kitaphana, mýzei, teatr qyzmetkerlerine qatysty másele. Olardyń eńbekaqysy sońǵy jyldary múlde kóbeigen joq. Sonyń saldarynan mádeniet qyzmetkerleri, ásirese jas mamandar jeńildigi bar turǵyn úi baǵdarlamaryna qatysa almaidy. Mundai ahýal osy kásiptiń bedelin túsirip, laiyqty kadrlardyń tapshylyǵy aiqyn sezilýde», - dedi Prezident Qazaqstan halqyna Joldaýynda.
