Azamat Satybaldy Ǵ.Músirepov atyndaǵy Qazaq memlekettik akademiialyq balalar men jasóspirimder teatry Direktorynyń mindetin atqarýshy bolyp taǵaiyndaldy. Bul týraly T.Q.Júrgenov atyndaǵy Qazaq ulttyq óner akademiiasynyń rektory Ashat Maemirov jelidegi paraqshasynda habarlady.
"Azamat Satybaldy - elimizdiń teatr jáne kino ónerindegi belgili esim. Qazaqstannyń óner keńistiginde óz joly, óz biigi! Óziniń kásibi ónerde tusaýy kesilgen M.Áýezov teatrynyń saxnasynda ulttyq jáne álemdik klassikalyq dramatýrgiialaryndaǵy keremet obrazdaryn somdap keledi! Azamat somdaǵan saxna men ekrandaǵy beineler - qazaq jastary úshin jarqyn úlgi! M.Áýezov atyndaǵy teatrdaǵy akterlik jumysynan bólek, 3 jyl buryn ózi qurǵan "28 Cinema” kompaniiasy jáne "28-Teathre” teatrynyń kórkemdik jetekshisi, bas direktory bolyp eńbek etip keledi. Jeke teatrymen Eýropadaǵy, Túrkiiadaǵy, Reseidegi xalyqaralyq teatr festivalderine qatysyp Qazaqstan ónerin shet elderde dáriptep, ózin myqty akter ǵana emes, kásibi menedjer-uiymdastyrýshy retinde dáleldei bildi. Jastardy qoldaýǵa arnalǵan respýblikalyq qoǵamdyq komissiialardyń múshesi" dep jazdy Ashat Maksimuly.
Azamat Satybaldy búgin Mádeniet jáne sport ministri A.Muxamediulynyń buiryǵymen Ǵ.Músirepov atyndaǵy Qazaq memlekettik akademiialyq balalar men jasóspirimder teatrynyń direktorynyń mindetin atqarýshy bolyp taǵaiyndalǵan. Teatr ujymyna jańa direktordy QR Mádeniet jáne sport vitse-ministri Aqtoty Raiymqulova tanystyrǵan eken.
Buǵan deiin atalǵan teatrdyń Direktory qyzmetin Sábit Ábdihalyqov atqaryp kelgen bolatyn.
Aita ketsek, Azamat Satybaldy 1977 jyly 2 qarashada Jambyl oblysy, Turar Rysqulov aýdanynda týǵan. Qazaqstannyń eńbek sińirgen qairatkeri (2014). Qazaqstan jastar odaǵy syilyǵynyń iegeri (2002). Muhtar Áýezov atyndaǵy Qazaq memlekettik akademiialyq drama teatrynyń akteri.
