Qaraǵandylyq meditsinalyq uiymdardyń MÁMS júiesi sheńberinde atqaryp jatqan jumystarymen densaýlyq saqtaý ministrliginiń ókilderi tanysyp qaitty, dep habarlaidy "Ult aqparat".
Qaraǵandy oblysynda kompiýterlik tomografiia, magnittik-rezonanstyq tomografiia syndy qymbat meditsinalyq qyzmet túrlerin paidalanǵandardyń sany artty. Mindetti áleýmettik meditsinalyq saqtandyrý júiesi engizilgenge deiin mundai qyzmet aiyna tek 1300 ge jýyq adamǵa kórsetiletin. Qazir olardyń sany úsh esege ósip, endi 4000-dai adamǵa qoljetimdi boldy. Sonymen qatar, jobanyń arqasynda jekemenshik áriptestik baǵdarlamasy boiynsha 5 emhana ashylyp, 8 ońaltý ortalyǵy qoldanysqa berildi.
Esterińizge sala keteiik, Qaraǵandy oblysynda meditsinalyq saqtandyrý júiesi 2019 jylǵy 1 qyrkúiekte iske qosylǵan bolatyn. Kenshiler aimaǵy bul jobany pilottyq rejimde bastady. Oblystaǵy eńbek etetin 395 myń azamat júz paiyz mindetti áleýmettik meditsinalyq saqtandyrý júiesine engizildi. Al 15 sanatqa kiretin 830 myń turǵynǵa memleket mindetti áleýmettik meditsinalyq saqtandyrý júiesi aiasynda tegin qyzmet kórsetedi. Sonymen qatar qazir aimaqta 90 myńnan astam ózin ózi jumyspen qamtýshy azamat bar. Ózin ózi jumyspen qamtityn azamattarǵa arnalǵan tólem terminaldary qarastyrylǵan. 2020 jyly Qaraǵandy oblysynda densaýlyq saqtaý salasyna 93 mlrd teńgeden astam qarajat jumsalady. Bul ótken jylmen salystyrǵanda, 24 protsentke artyq. Onyń úshten bir bóligi mindetti meditsinalyq saqtandyrýǵa baǵyttalǵan.
«Mindetti áleýmettik meditsinalyq saqtandyrý júiesi qarajatty ulǵaityp, qosymsha meditsinalyq qyzmet kórsetetin ýchaskelerdi ashýǵa múmkindik berip otyr. Bizdiń basty maqsatymyz meditsinalyq mekemelerdegi úlken kezekterdi azaitý. Ár ýchaskege 1500 adamnan ǵana tirkesek, halyq meditsinalyq qyzmet túrlerin kezeksiz paidalana alady. Osylaisha sapaly meditsinalyq qyzmetti qoljetimdi etemiz», - dep málimdedi QR Densaýlyq saqtaý ministrligi MÁMS departamentiniń direktory Azamat Ómirtaev.
