Foto: ashyq derekkóz
Prezident Qasym-Jomart Toqaevtyń áleýmettik qoldaýǵa baǵyttalǵan tapsyrmalaryn júzege asyrý aiasynda az qamtylǵan otbasylar úshin jańa tsifrlyq vaýcherlik júie engizilýde. Bul týraly Úkimet otyrysynda «BTS Digital» kompaniiasy direktorynyń mindetin atqarýshy Erjigit Balqybekov málimdedi, dep habarlaidy Ult.kz.
Pilottyq joba ataýly áleýmettik kómek (AÁK) alýshylarǵa arnalǵan jáne áleýmettik mańyzy bar azyq-túlik taýarlaryna jeńildik berýdi kózdeidi. Vaýcherler «eGov Mobile» qosymshasyndaǵy «Áleýmettik ámiian» servisi arqyly iske asyrylady. Júie boiynsha otbasynyń ár múshesine bir ailyq eseptik kórsetkish (AEK – 3 932 teńge) mólsherinde jeńildik qarastyrylady. Mysaly, tórt adamnan turatyn otbasy úshin jeńildiktiń jalpy somasy shamamen 16 myń teńge bolady.
Joba Aqkól qalasynda iske qosylyp, qyrkúiek aiynyń sońyna deiin Kókshetaý men Pavlodar qalalarynda da jumys istei bastaidy. Sátti nátije kórsetken jaǵdaida, bastama 245 myńnan astam AÁK alýshyny qamti otyryp, el kóleminde keńeitiledi.
Tsifrlyq vaýcherlerdi paidalaný tártibi de qarapaiym: AÁK alýshy dúken kassasyna QR-kodyn kórsetedi, sol arqyly nan, jarma, kókónis, et, sút siiaqty negizgi ónimderdi jeńildetilgen baǵamen satyp ala alady. Naryqtyq jáne jeńildikti baǵa arasyndaǵy aiyrma vaýcher arqyly jabylady, al qalǵan somany azamattyń ózi tóleidi.
Joba turaqtandyrý qory esebinen qarjylandyrylady. Jalpy 100 mlrd teńge bólinip otyr:
🔹 35 mlrd teńge – saýda jelilerin jeńildikpen kreditteýge,
🔹 65 mlrd teńge – otandyq fermerler men óndirýshilerden forvardtyq ónim satyp alýǵa baǵyttalady.
Mundai mehanizm arqyly AÁK alýshylar azyq-túlikti 25%-ǵa deiin jeńildikpen ala alady. Joba áleýmettik ádilettilikti nyǵaityp, eldegi azyq-túlik qaýipsizdigin qoldaýǵa baǵyttalǵan mańyzdy qadam bolmaq.
