Elordada az qamtylǵan otbasydaǵy ár balaǵa 40 myń teńgeden kómek kórsetiledi. Bul týraly pedagogika qyzmetkerleriniń tamyz keńesinde elorda ákimi Altai Kólginov aitty, dep habarlaidy QazAqparat.
«Taǵy bir mańyzdy taqyryp - otbasydaǵy balalardyń jaǵdaiy. Jyl saiyn jalpyǵa mindetti orta bilim baǵdarlamasy boiynsha muqtaj oqýshylarǵa materialdyq kómek kórsetiledi. Ótken jyly az qamtylǵan otbasylardaǵy ár balaǵa 30 myń teńge mólsherinde kómek kórsettik. Ol kómekti 12 700 bala aldy», - dedi qala basshysy.
Onyń aitýynsha, biyl bul mólsher 10 myń teńgege arttyrylyp 40 myń teńgege jetkizilgen. Endi kópbalaly otbasyda 4 bala bolsa 160 myń teńgeniń, 3 bala bolsa, 120 myń teńgeniń materialdyq kómegi kórsetiledi.
«Árine, bul qazirgi jaǵdaida, jumys toqtap, shaǵyn biznes tarapynan 60 mlrd teńge biýdjetke túspei qalǵan kezde qiyn. Biraq, soǵan qaramastan biz, ásirese, az qamtylǵan otbasylardy qoldaýdy jalǵastyrýdamyz. Alaida qazaqtyń jalpaq tilimen aitqanda «sýdyń da suraýy bar». Óitkeni, ata-analar qarajatty qolǵa berińder dep jatyr. Biz de sony qaladyq. Biraq, zań boiynsha olai jasai almaidy ekenbiz. Sebebi Úkimet qaýlysynda ol qarajatty jumsaýdyń naqty maqsaty kórsetilgen. Eń aldymen balalarǵa mektepke qajetti kiim-keshek, mektep zattaryn alý kerek. Memlekettik biýdjet bolǵannan keiin árbir tiynnyń esebin berýimiz kerek. Sony túsindirdik, ata-analar túsindi», - dedi Altai Kólginov.
