Qarjy ministrligi jeke tulǵalar úshin salyq raqymshylyǵyn ótkizý tártibin túsindirdi. Amnistiia aiasynda salyqtyń negizgi somasy tólengen bolsa, aiyppul keshiriledi, dep habarlaidy Sputnik Qazaqstan.
Qarjy vitse-ministri Qanat Baedilovtyń aitýynsha, jyldyń basynda 1,4 million jeke tulǵanyń salyq boiynsha jalpy qaryzy 20,9 milliard teńge bolǵan. Sonyń ishinde negizgi bereshektiń kólemi - 14,3 milliard teńge, al ósimpuldar – 6,6 milliard teńge.
"Qaryzdyń basym bóligi kólik úshin tólenetin salyqqa tiesili. Odan keiin jer men múlik salyǵy keledi. Al bereshegi bar jeke tulǵalardyń sany jaǵynan Shymkent qalasy kósh bastap tur. Ol jerde shamamen 148 myń adam salyq tólemei júr. Sosyn Túrkistan oblysy – 139 myń adam, Jambyl oblysy – 116 myń adam, sondai-aq Nur-Sultan qalasynda 114 myń qaryz bar", - dedi Baedilov úkimet úiinde ótken baspasóz máslihatynda.
Onyń sózine qaraǵanda, 2019 jyldyń 1 qańtaryna deiin bereshegi bar adamdar negizgi salyqty tólese, ósimpuldardyń bárin alyp tastaidy. Al biyl salyqty da, ósimpuldy da óz erkimen tólegen adamdarǵa aiyppuldyń aqshasy qaitarylady. Qazir ministrlik qarajatty qaitarý tetikterin ázirlep jatyr.
"Ósimaqyny esepten shyǵarý úshin memlekettik organdarǵa barýdyń qajeti joq. Qaryzdyń negizgi somasy tólense boldy. Memlekettik kirister organdary kún saiyn jeke tulǵalardyń esepshottaryn qarap otyrady. Negizgi qaryz tólengen jaǵdaida tiisti sheshim qabyldap, úsh kún ishinde ósimpuldy esepten shyǵarady", - dep túsindirdi Baedilov.
Vitse-ministr tiisti zańǵa qol qoiylǵanyn da eske saldy. Bul qujat 16 shildede kúshine enedi. Qarjy ministrligi buiryq rásimdep, shildeniń 20-synan keiin jumysqa kirispek.
