Almaty qalalyq jasyl ekonomika basqarmasy Aiýsai shatqalyndaǵy aǵashtardyń kesilýine qatysty túsinikteme berdi, dep habarlaidy "Ult aqparat".
Jasyl ekonomika basqarmasynyń málimetishe, «Qazseldenqorǵaý» memlekettik mekemesi Aiýsai saǵasynan tómen Úlken Almaty ózeninde selden qorǵaityn bóget salyp jatyr. Osyǵan bailanysty jasyl jelekti otaǵan. Alaida, basqarma aǵashtardy kesýge ruqsat bermegen.
«Áleýmettik jelilerde paida bolǵan 5000 aǵash kesildi degen aqparat shyndyqqa janaspaidy. Basqarma qyzmetkerleri Botanikalyq baqtyń dendrologtarymen birge birneshe ret kesilgen aǵashtardyń sanyn jáne túrin anyqtaý úshin ýchaskege bardy. Mamandardyń aitýynsha, qysqy ýaqytta kesilgen aǵashtar men butalardyń sanyn eseptep shyǵarý qiyn boldy», - dep habarlady basqarmadaǵylar.
Aralyq zertteý nátijeleri boiynsha, 32 myń sharshy metrdi quraityn aýmaqta aǵashtar zańsyz kesilgeni anyqtaldy.
Botanikalyq baq usynǵan málimeterge sáikes, Aiýsai shatqalynda raýshan gúli, shyrǵanaq, bóriqaraqat, qaiyń, terek, dolana, alma, aq tal kesilgen.
«Jasyl jelekterdi kútip-ustaý men qorǵaýdyń standartty erejelerin buzǵany úshin jaýaptylar jiyrma eselik kólemde ótemaqy otyrǵyzýy kerek. Iaǵni, 23780 jasyl jelek otyrǵyzylýy tiis. Aita ketý kerek, Úlken Almaty ózeni basseinine, Aiýsai shatqalyna jáne Aqsai ózeniniń basseinine selden qorǵaityn bógetter qajet. Bul óte mańyzdy. Óitkeni 300-ge jýyq áleýmettik jáne óndiristik nysandar, sondai-aq 30 myń adam turatyn turǵyn úige qaýip bar. Aqsai ózeniniń basseininde selden qorǵaityn bóget joq», - dep atap ótti jasyl ekonomika basqarmasy.
Almaty qalalyq Tótenshe jaǵdailar departamentiniń aqparattaryna sáikes, bóget eldi mekenderdi selden qorǵaidy.
Jasyl ekonomika basqarmasy, tergeý jumystary jalǵasatynyn jáne aiaqtalǵannan keiin nátijeler týraly tolyq aqparat beretinderin jetkizdi.
