Astana qalasynda prezident Nazarbaevtiń qatysýymen «Jastar jylynyń» resmi ashylýy ótip jatyr. Shara aiasynda atqarýshy bilik ókilderi galstýksyz jinalyp, jastar ókilderin tyńdaýda. Jastar forýmyn «Qazaqstan» ulttyq arnasy tikelei efirden kórsetýde, sondai-aq búkil óńirler boiynsha tikelei efirden oqý ordalary tamashalap jatyr.
Jastar forýmynda sóz alǵan búrkitshi qyz Aisholpan Nurǵaiypqyzy óziniń jetistikterin aita kelip, prezident Nazarbaevqa Monǵoliiadaǵy qandastardyń sálemin jetkizdi.
«Meni ákem Nurǵaiyp búrkit baptap úiretti, anam árkez qoldady. 8 jasymda búrkitti qolyma qondyrdym. Búrkit baptaý úshin qaisarlyq qajet. Osy Astanada, basqa qalalarda qazaqtyń salt-dástúrlerin oqytatyn ortalyqtar, sonyń ishinde búrkitshiler mektebi ashylsa degen armanym bar. Aitpaqshy, umytpai turǵanda aita ketsem, Altaidaǵy az ǵana qazaqtyń amanaty bar edi, Sizdi Bai-Ólkege qonaq bolýǵa shaqyramyz. Aq dastarhannan dám tatyp ketseńiz, alystaǵy aǵaiynnyń rýhy bir jasap qalar edi», – dedi Aisholpan óz sózinde.
Esterińizge sala ketsek, 2016 jyly Mońǵoliiada turatyn qazaq qyzy Aisholpan Nurǵaiypqyzy týraly «Búrkitshi qyz» atty rejisser Otto Belldiń derekti filmi shyqqan bolatyn. Alǵash ret 2014 jyly aǵylshynnyń Daily Mail basylymy «Qazaqtyń salt-dástúrindegi asyl qundylyqtardyń biri — qusbegilik ónerin igergen on úsh jasar jalǵyz qyz» atty Aisholpan jaily maqala jariialap, ony búkil álemge tanymal etti. Qandasymyz 2018 jyly Qazaqstanǵa arnaiy shaqyrýmen kelip, «Bilim-innovatsiia» HQQ bergen grantpen «NurOrda» mektep litseiinde bilim alyp jatyr.
Aita keteiik, elordadaǵy «Nur álem» pavilonynda Elbasy Nursultan Nazarbaevtyń qatysýymen «Táýelsizdik urpaqtary» atty jastar jylynyń saltanatty ashylý rásimi ótip jatyr.
QR Prezidenti Nursultan Nazarbaev Qazaqstan halqyna ótken jylǵy Joldaýynda 2019 jyldy Jastar jyly dep jariialaýdy usynǵan bolatyn. Prezident óz sózinde jastardyń barlyq sanatyn qoldaýǵa arnalǵan sharalardy tolyq qamtityn áleýmettik satynyń aýqymdy platformasyn qalyptastyrý kerektigin aitqan edi. Al, arada bir aidan astam ýaqyt ótkende Elbasy Jarlyǵymen 2019 jyl Jastar jyly dep jariialandy.
