Dástúrli emes islamdy ustanýshylarǵa, olardyń otbasyna memleket tarapynan maqsatty túrde kómek kórsetiledi degen uǵym týmaýy tiis. Mundai maqsatty áreket joq, bolýy múmkin de emes. Bul týraly búgin QR qoǵamdyq damý ministrligi qoǵamdyq kelisim komitetiniń ǵylymi-zertteý jáne taldaý ortalyǵynyń direktory Ainur Ábdirásilqyzy konferentsiia barysynda aitty, dep habarlaidy Sputnik Qazaqstan tilshisi.
Ortalyq direktory teris aǵymda júrgen azamattarǵa memleket tarapynan nelikten kómek kórsetiletinin túsindirdi.
"Birinshiden, dástúrli emes islamdy ustanýshylarǵa, olardyń otbasyna memleket tarapynan maqsatty túrde kómek kórsetiledi degen uǵym týmaýy tiis. Mundai maqsatty áreket joq, bolýy múmkin de emes. Másele mynada: dástúrli emes nemese radikaldy aǵym ideologiiasyna elitip júrgen tulǵalarmen turaqty túrde ońaltý jumystary júrgiziledi. Óitkeni mundai aǵymdardyń memleket jáne qoǵam úshin, onyń ishinde dindar azamattardyń ózderi úshin zalal-zardaby shash-etekten. Memleket úshin árbir azamattyń orny bólek, óitkeni ata zańymyzda aitylǵandai, memlekettiń eń basty bailyǵy — adam jáne onyń ómiri, quqyqtary men bostandyqtary.
Sondyqtan dástúrli emes aǵymda júrse de memleket óz azamatyn syrtqa teppeidi, kerisinshe dástúrli qoǵam qundylyqtaryna oraltý úshin qoldan kelgenniń bárin jasaidy", — dedi maman Astana qalasynda "Jastardy rýhani-adamgershilikke tárbieleýdegi jáne radikaldy dini ideologiiaǵa qarsy immýnitet qalyptastyrýdaǵy áielder uiymdarynyń róli" atty konferentsiia barysynda.
Munymen qatar, Ainur Ábdirásilqyzy dál osyndai sebeptermen bul azamattarmen jumys júrgizý barysynda olarǵa zaiyrly memleket qaǵidattary men zańnamalaryn, dástúrli emes dini aǵymdardyń zalalyn, radikaldy ideologiianyń zardaptary men olarǵa elitýdiń saldarlaryn taldap-túsindirip, uzaq ta tabandy túrde aqparattandyrý sharalary júrgiziletinin aityp ótti.
Buǵan qosa ádette mundai aǵym ókilderi qoǵamnan oqshaýlanyp, kóbine-kóp jamaǵat aiasynda shekteletindikten, sonyń ishinde ásirese áiel azamattar oqý men jumystan qol úzip, kúnkóris kózi bolmai qalatyndyqtan, kóp jaǵdaida olar joldastarynan talaq alyp, balalarymen asyraýshysyz qalatyndyqtan memleket jáne úkimettik emes uiym ókilderi, ońaltý ortalyqtary, Qazaqstan musylmandary dini basqarmasy tarapynan olarǵa adam retinde, azamat retinde qoldaý-kómek sharalary uiymdastyrylady.
"Sonyń ishinde qaiyrymdylyq kómek kórsetip, azyq-túlik paketterin taratý, "Mektepke jol" aktsiiasy qarsańynda balalarǵa kiim-keshek pen oqý qural-jabdyqtaryn taratý, ata-analarynyń mamandyq alýy úshin tegin kýrstar uiymdastyrý, tegin meditsinalyq kórsetý, tigin qural-jabdyqtaryn taratý, ynta bildirýshilerdi qoǵamdyq ortaǵa keńinen tartý úshin arab tili men dini kýrstardy uiymdastyrý, ózderi jasaǵan buiymdardy saýdaǵa qoiý úshin jármeńkeler uiymdastyrý sekildi túrli sharalar júrgizilip jatady", — dedi Ainur Ábdirásilqyzy.
Sonymen qatar, maman quqyqtyq saýatsyzdyq saldarynan járdemaqylarǵa, balalaryn tirkeýge qoiýǵa, balabaqshaǵa ornalastyrýǵa, t.b. kóptegen sharaǵa múmkindigi jetpei júrgenderge de keńes berilip, qoldaý kórsetiletinin aitty. Iaǵni munyń barlyǵy ońaltý jumystarynyń bir salasy — áleýmettendirý baǵytyndaǵy qalypty sharalar bolyp tabylady. Bul jumystardyń maqsaty — áleýmettik qoldaý kórsete otyryp, atalǵan azamattardy qoǵamǵa jáne zaiyrly qundylyqtarǵa qaita beiimdeý. Bul tájiribe Qazaqstanda ǵana emes, álem memleketteriniń barlyǵynda derlik júrgiziledi.
"Atap aitý kerek, joǵaryda atalǵan sharalar barysynda tek dástúrli emes aǵym ókilderine ǵana emes, kómekke zárý qatardaǵy qoǵam múshelerine de járdem beriledi. Ókinishke orai, dástúrli emes aǵym ókilderi tarapynan keide ózderine qatysty astam pikirler de týyndap jatady.
Naqty aitqanda, "memlekettiń ózi bizge barlyq jaǵdaidy jasap jatyr, demek, olar bizdi moiyndaidy nemese qorqady" degen pikirlerdiń oqshaýlanǵan jamaǵattar arasynda tarai bastaǵanyna biz kýá bolyp júrmiz.
Bul oraida olar memlekettiń dástúrli emes aǵym múshelerinen qoryqqandyqtan nemese olardy qoldaǵandyqtan emes, adam jáne azamat taǵdyryna úlken jaýapkershilikpen qaraǵandyqtan, quqyqtyq qundylyqtardy qurmettegendikten osyndai izgi qadamdarǵa baryp otyrǵanyn túsinbeidi nemese moiyndaǵysy kelmeidi", — dedi QR qoǵamdyq damý ministrligi qoǵamdyq kelisim komitetiniń ǵylymi-zertteý jáne taldaý ortalyǵynyń direktory.
Osy oraida, Ainur Ábdirásilqyzy mundai ushqary pikir, shetin kózqarastardy týyndatpaý úshin endigi kezekte ońaltý sharalary barysynda áleýmettik qoldaý kórsetýde qandai da bir qosymsha sharttardy qarastyrýdy usyndy. Ári qarai ol bul sharalardyń qaitarymy bolýy kerektigin aityp ótti. Iaǵni teris dini aǵymǵa kirgen azamattardan osy tegin kómek pen jeńildikterdi paidalanǵany úshin qarymtasyn alyp otyrý qajet. Sebebi, kei azamat muny teris maqsatta paidalanyp, radikaldy dindegiler arasynda nasihattap júr.
"Biraq joǵaryda atap ótken sharalardy tartyna júrgizýge týra keledi. Olardyń tarapynan qandai da bir qarymta bolýy kerek degen shartty zańdastyryp qoiý kerek siiaqty. Óitkeni sońǵy kezderi radikal ókilderiniń tarapynan "Kórdińizder me? Memlekettiń ózi bizge bar jaǵdaidy jasap otyr. Qudaidyń qudiretimen memleket bizge qyzmet etýde" degen astamshylyq pikirler aitylyp júr. Budan ózge keibir azamattar "Dástúrli emes dinge ótip ketseń, jaqsy eken. Sebebi memleket bar jaǵdaiyńdy jasap beredi" degen oida júr", — dedi Ainur Ábdirásilqyzy.
Munymen qatar, maman búginde aqparattyq-túsindirý jumystarynyń eki baǵytta júrgizilip otyrǵanyn aityp ótti. Birinshisi — ekstremizm men terrorizm profilaktikasy, iaǵni aldyn alý sharalary. Ekinshisi — radikaldardyń yqpalyna túsken ár áielmen naqty jumys júrgizý. Mundaida ár áiel tulǵa bolǵandyqtan, olardyń árqaisysyna jeke shara taǵaiyndalady.
