Aimaq ákimderi Kongo-Qyrym gemorragiialyq qyzbasy aýrýynyń aldyn alý sharalaryn qolǵa alýy kerek. Bul týraly Úkimet otyrysynda QR Densaýlyq saqtaý ministri Aleksei Tsoi aitty, dep habarlaidy QazAqparat.
«Qazaqstan aýmaǵynda tabiǵi oba, týliaremiia, gemorragiialyq qyzba (gemorragiialyq qyzba, Kongo-Qyrym gemorragiialyq qyzbasy), sibir jarasy jáne basqa zoonozdy infektsiialar bar. Aldaǵy epidemiialyq maýsymǵa bailanysty aimaq ákimderi turǵyndar arasynda erekshe qaýipti infektsiialardyń aldyn alý sharalaryn ýaqtyly júzege asyrý qajet», - dedi Aleksei Tsoi.
Onyń aitýynsha, elimizdiń ońtústik aimaqtary Kongo-Qyrym gemorragiialyq qyzbasynyń jiiligi boiynsha endemikalyq bolyp qala beredi.
«Kongo-Qyrym gemorragiialyq qyzbasynyń epidemiialyq maýsymy bastalýy qarsańynda aimaq ákimderi bul aýrýdyń aldyn-alý sharasyn qolǵa alýy qajet. Atap aitqanda: býferlik aimaqtardy qurý, mal men mal ǵimarattaryn, eldi mekenderdegi jeke sharýa qojalyqtaryn, qorshaý men onyń ainalasyn kenege qarsy óńdeý kerek.
Ótken jyldardaǵy tájiribeni eskere otyryp, alǵashqy meditsinalyq-sanitarlyq kómek, shuǵyl meditsinalyq kómek jáne basqa da tar mamandyqtardaǵy meditsinalyq qyzmetkerlerdiń qyraǵylyǵy men daiyndyq deńgeiin arttyrý boiynsha sharalardy Kongo-Qyrym gemorragiialyq qyzbasyn erte anyqtaý jáne differentsialdy diagnostikalaý turǵysynan júzege asyrý qajet», - deidi ol.
